Traduzione in ladino
Pescoi da mont, i prumes didamenc per 1,1 milions de euro
Contribuc per vaces joenes: l é temp enscin ai 3 de messèl per portèr dant la domanes
[Ladino] L é beleche de 1,1 milions de euro l valor del didament che la Provinzia autonoma de Trent ge arsegurea ai arlevadores per monteèr la vaces joenes, col obietif de integrèr la suma e ruèr a 1,8 milions de euro co la manovra de assestament de bilanz che vegn. L avis – aproà da la Jonta, aldò de la proponeta del assessor a l’agricoltura – l perveit che vegne portà dant la domanes a scomenzèr da en lunesc ai 27 de mé e enscin ai 3 de messèl del 2024, tras l portal SrTrento.
L é n intervent de sostegn ai pescoi da mont, che vel engaissèr la firmes da paur a fèr chesta atività tradizionèla che porta gregn benefizies per la besties e per l teritorie da mont, col sostegnir sia cura e sia atratività.
L didament l é n finanziament dal valor mascimal de 200 euro per vigni cef de bestiam monteà (enscin a n mascimal de 40 besties) per amancol 70 dis anter l 1m de jugn e i 15 de setember. Chesta suma la perveit la speises a cheles che la firmes da paur cogn ge fèr front per monteèr, soraldut per l fit di terens e de la mèlghes, e ence l trasport del bestiam e de dut chel che serf per monteèr la vaces. La novitèdes les é sacotantes respet al passà, a partir da la prozedures più sorides e da la sort de didament, che no la é più a de minimis. L é stat jontà ite ence na desposizion aldò de chela che, cò un o più ceves de bestiam vegn magnà da la gran besties magnacèrn, l finanziament l vegn calcolà endodanef en proporzion ai dis che l bestiam l é stat a past: tel passà chest no vegnia ametù a contribut.
(cdt)
Immagini
