En doi nai Zòmmtrèff billts mear bèrt kemmen gem, pet an mearervurmschloss, en de richtung ont en de naiekaitn as noschaung en de hoachen lander, bou as òlbe mear lait vort gea’, bou as de lait as plaim mear elter kemmen, bou as hòt a turistikdruck ont bou as de gamoa’schòft òlbe ermer kimmp, ver za vourstelln naia vourtschbinnen ont projektn.
Durch gadenkpaitrogn ont vourstelln va studiareta platz bart men se auhòltn za verstea’ bos as s ist gabèckslt en de jarder, en sèll as s ist noch za passiarn en de doin zaitn ont as de projektn, strategi ont politik ver de zukunft. S barn toalnemmen vil auskenneta lait abia de Letizia Bindi (UNIMOL), de Federica Buffa (UNITN), der Marco Bussone (UNCEM), de Federica Burini (UNIBG), der Paolo Costa (FBK), der Roberto Poli (UNITN), der Annibale Salsa (TSM Step) ont der Pier Paolo Viazzo (UNITO).
Der zòmmtrèff bart organisiart kemmen en drai plenartrèffn ont zboa tiavatrèffn as de temen: kultur ont lòntschòft, lòntwelfare, birtschòftbòcks ont turistikbòcks.
Der innlon za trong an aigenen tschbinnpaitrog, de vourtschbinnen ont sèll as auser kimmp va de suach keart en de lait as studiarn de bècksln van hoachen lander, en de suacher junior ont senior, en de auskenneta lait ont en de polcy maker as billn bèrt gem en de pèrnglander.
De abstract ont de poster barn meing kemmen tschickt vour de 26 van oberel 2024 ont de barn kemmen tschazt van bischòft komitat van Zòmmtrèff.
De sòchen ver za mèllnse u’ meing kemmen oarganommen va de sait Call for abstract ont poster, bou as der bart vinnen òlla de nochrichtn van Zòmmtrèff.
Der Zòmmtrèff ist organisiart pet en schutz va: de autonome Provinz va Trea’t, va de onlus Lòntschòftn, van tsm|step Schual ver en lòntregiar ont ver de lòntschòft ont van Gamoa’n Gamoa’schòftn Pèrngdinstn Zòmmstòtt.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
