Traduzione in mòcheno

Paitrong ver de lokaln nochrichtn: u’ganommen de nain regln

De radiotelevisionsender ont de nochrichtnportaln as òrbetn en Trentin barn meing vourstelln de vrog va paitrog ver za meing hilf hom asou abia as paschraip s provinzal gasetz van 2016 as de lokaln nochrichtn, va de 2 finz as de 31 van schanmikeal. 
En vraita as de 15 van leistagest de provinzaljunta hòt u’ganommen de ausrot bou as drinn ist der nai verregl van kritern ont van virm ver za kriang paitroger unter en “de minimis”, ver za unterstitzn s envirtrong van sèlbergamòcht nochrichtn as va lokalenteress sai’.
De bècksln as gamòcht kemmen sai’, trong an biderausschaung van applikativkritern asou za sai’ laichter ont za kennen pesser kontrolliarn de vourschriftn ont de pflichtn. Derzua, de virm ver za kriang de hilfn barn nea’mer gem kemmen abia staierzoln, ober der paitrog en kapitalkonto bart gem kemmen derekt avn ponkkonto van bèrk as en kriag.