A la scontrèda à tout pèrt ence l dirigent general del Departiment infrastrutures de la Provinzia,
Luciano Martorano, e l dirigent general del Departiment teritorie e trasporc, ambient, energia, Roberto
Andreatta.
Belimpont Andreatta l é jit ite tel detai di provedimenc che la Jonta provinzièla la vel tor su al più prest.
"Aldò de chel che l é stat palesà dai teritories, l é debesegn fèr na neva deliberazion con chela che vegn tout demez l enteres publich per la spersa de i Masi, desche pervedù da la deliberazion nr. 2173 del 2022, e vegn confermà l’intenzion de fèr su n ospedèl nef – l à spiegà Andreatta - . Per chel che vèrda l lech, tegnan semper cont de chel che l é vegnù fora dal confront coi enc locai, vegnarà dat diretives al Departiment teritorie, trasporc, ambient, energia e cooperazion de meter dantfora, per la valutazions tecnich-ambientèles, na spersa grana anter Ciavaleis e Pardac, e de fèr vèlch verifica en cont de la zona Dossi“.
Dintornvia la localisazion, Andreatta l à ence dit avisa che: "La Jonta, tel respet del Pian Urbanistich Provinzièl, la met dant indicazions de mascima, col tegnir cont di criteries desche l numer di abitanc, la viabilità, l spostament di turisć, l livel de urbanisazion de l’area per sparagnèr la doura de teren – l à spiegà – e do, ge pervegn a la comunanzes ruèr a troèr ghenao l lech, sessaben aldò de la analises tecnich-ambientèles portèdes dant da la Provinzia e tras la
redazion del Pian Teritorial de Comunità.
Donca, te curt temp l’Agenzia per i apalc e i contrac (Apac) la se festidiarà de meter ju e publichèr na manifestazion de enteres, con ite l chèder di besegnes aldò de chel che l é vegnù fora enscin ades, outa a duc i operadores enteressé, acioche zachei mane ite vèlch proponeta su n pian generèl.
Per chesta costion l president l à metù al luster che la proponetes de projet per l ospedèl nef no les jirà inant enfin a canche no vegnarà dit avisa che che se vel fèr per l davegnir del frabicat e de la spersa del ospedèl veie.
L'intervista al president Fugatti
I filmac de la scontrèda
I retrac e la intervistes se pel les tor ju da chest link
Traduzion di Servijes Linguistics e Culturèi del Comun general de Fascia
