I sentadins trentins che ciaparà la neva tessera sanitèra zenza l microchip (TS) i podarà durèr amò scin ai 31 de dezember del 2023 chela veia col microprozessor (TS/CPS), ativèda dant, ence se dedant la data la disc che no la é più valevola.
Dut chest per ge dèr l met ai sentadins de seghitèr a se emprevaler di servijes digitèi sui portai istituzionèi de la aministrazion publica per chi che vegn domanà l azes tras identità digitèla. Descheche l é ja stat dit, tel Trentin passa 18 mile sentadins doura la tessera col chip per i servijes online. La maor pèrt di Trentins, passa 220 mile utenc, i preferesc l sistem Spid, da poder durèr sun duc i computer, tablet o smartphone. Chiò troède duta la informazions per domanèr Spid tel Trentin: https://www.provincia.tn.it/Servizi/Richiedere-SPID.
I servijes digitèi i revèrda, per ejempie, la sanità (cartela clinica), scola (enscinuazions e register eletronich), cataster, contribuc publics, enscinuazions concorsc, enscinuazion lingia telematica de la firmes, paamenc a la publica aministrazions. Descheche l é ja stat dit, duc con azes tant tras tessera sanitèra con chip che con Spid.
Co fèr per sperlongèr la validità de la tessera sanitèra con chip (TS/CPS) jita fora di termins de validità.
Dantdaldut la operazion de sperlongiament la cogn vegnir fata dant che vae fora i termins de validità de la veia tessera TS / CPS.
La prozedura de sperlongiament del zertificat de autenticazion de la veia tessera sanitèra col microchip la é a la leta a la direzion: https://sistemats1.sanita.finanze.it/portale/elenco-driver-cittadini-modalita-accesso.
Co se é ite tel portal, se cognarà ge jir do a la istruzions per l adatament eventuèl del software e aer l Pin e l Puk de la tessera sanitèra che é do a jir fora de validità. I doi codejes i ge é stac consegné al utent endèna la pruma ativazion de la tessera TS / CPS e aboncont se pel i recuperèr aló dai portie sul teritorie che se cruzia de l’assistenza. Junsom l é a la leta l link co la informazions e la lingia di portie tel Trentin.
Do aer fat la verifiches e i adatamenc, l sentadin l pel lejer la tessera de gra al letor de smart card. L sistem, recognosciù l document, l abilitea l sperlongiament de la validità de la card, drucan l boton “Rinnova”. La prozedura la perveit de azetèr la informativa su la privacy, de meter ite i codejes Pin e Puk.
Do aer fenì la registrazion, la veia tessera sanitèra col chip (TS / CPS) la podarà vegnir durèda, demò per i servijes online de l’aministrazion publica, scin a la fin del an che vegn.
Info Portie teritorièi Trentin:
https://www.provincia.tn.it/Servizi/Attivare-la-Carta-Provinciale-dei-Servizi-CPS.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
