En cont de la ativitèdes didatiches, la maor pèrt de la 1.058 presenzes la é raprejentèda dai 624 studenc de la Scola ladina de Fascia, per chi che i percorsc é stac porté dant per ladin, dapodò da 120 studenc e studentes da de autra scoles da foradecà, privates o equiparèdes e da passa 200 persones che les é jites do ativitèdes personalisèdes o giornèdes de formazion, desche compagnadores de mesa mont o jent grana di corsc de ladin. Dut chest l é sessaben n toch emportant del lurier che l Istitut fèsc per ge jir do a so zil, che l é apontin chel de portèr pro a slarièr fora la cognoscenza de la istoria, ma ence de tradizion e usanzes del popul ladin, tras na bela colaborazion co la scola e la sociazions.
Chest an l Istitut Cultural Ladin de Fascia, dessema a la sociazion “Sul fronte dei ricordi” e al Comun de Moena, col sostegn de la Region Trentin-Südtirol, de l’Apt de Fascia e del Comun General de Fascia, à recordà apontin i 10 egn de la mostra “La Gran Vera / La Grande Guerra” e i 110 egn de istoria passé dal scomenz de chest aveniment rie e pesoch per la nazions e la popolazions toutes ite. Per chest l percors à pervedù ence scontrèdes con esperc pissèdes apontin per i studenc e la studentes del ultim an de la scola mesèna de la val. I studenc à podù scutèr su informazions enteressantes da la ousc ferèda del curator onorarie de la Mostra, Michele Simonetti Federspiel, jan do i fac de n tous e de na tousa da Moena che à vivù tel temp de la Pruma Vera. Dapodò i à podù tor pèrt a vijites treatralisèdes portèdes dant con pascion e braura da Ilaria Chiocchetti e David Dorich, da cheles che i à podù se emprevaler per lurèr fora dessegnes e slogan che ades se pel veder metui fora te posć segnificatives te duta la val.
Col prum de messèl 2024 pea via endodanef la ativitèdes da d’istà del Museo. La giornèda de lunesc la é dedichèda a “Giramuseo”, n bel percors fora per la sales espositives pissà apontin per la families. Via per la giornèda, ti oraries de museo, bec e genitores pel ge jir do a la indicazions de n libret da colores che, très jeghes e conties, ge dèsc l met de fèr dessema n bel viac a la descorida de la jent e de la cultura ladina… e a la fin, se dut carenea, l é ence n pest! La seconda atività l é la classica vijita vidèda al Museo, che no la pel mencèr te la proponetes ai ghesć. En ultima, chest an i Servijes educatives del Museo à lurà fora na atività spezièla per bec e bezes da 8 a 12 egn aló da la mostra La Gran Vera ja Moena: “Caccia alla traccia” la mena i bec a cognoscer desvalives aspec de la Gran Vera te noscia val, a na vida adatèda a l’età joena di partezipanc.
Per fenir la proponetes da d’istà, l Museo ge sporc a si ghesć la mostra ”Franz Dantone. Fotograf de la Dolomites” che raprejenta n gran melaur per la Val de Fascia e la valorisea l lurier de Franz Dantone Pascalin, l prum forograf fascian, nasciù ta Ciancei del 1839. De gra a sie lurier pascionà e a la realisazion de passa mile foti de gran calità, Pascalin à portà pro a la definizion del imaginarie coletif che à permetù de scriver ite la Dolomites te la lingia del Patrimonie Mondièl. La esposizion la è fata de 74 fotos, na pèrt originèles da enlouta e na pèrt stampèdes a butèda de inchioster da reproduzions digitèles otegnudes da la lèstes de vierech restaurèdes anchecondì.
De autra informazions, dates e oraries sun: https://www.istladin.net/it/
