
La Provinzia, descheche l é pervedù da la lege provinzièla en cont a la ativitèdes culturèles (L.P. 15/2007), la recognosc i musees etnografics sostegnui dai enc dal post, da sociazions o da sentadins, desche enc che à desche obietif l stravardament de la tradizions del post, con chela de tegnir su e valorisèr elemenc materièi e no materièi de la cultura dal post, de la tradizions populères e del folclor, ma ence di dialec, di saeres e de la gestion de l’agricoltura, di bosć e de la besties e del teritorie. Per l an 2023, donca, la Provinzia la vel finanzièr i projec porté dant dai musees e dai sic de enteress etnografich scric ite te la lingia dita, aproèda da pech da na determinazion del sorastant del UMSe rei etnografica di picoi musees e ecomuseèla Giovanni Kezich. Chisc enc i podarà manèr ite na domana de contribut per projec che à l obietif de tegnir su e valorisèr la cultura del post.
I projec i podarà tor ite, per ejempie, fèr publicazions, inventères, cataloghes, tulins didascalics; meter en segureza l museo; fèr la manutenzion di materiai o del sit internet; tegnir su, neteèr, restaurèr i materiai; l endrez e l’aministrazion di lesc de luriere di musees (personal, colaboradores, servijes aministratives, posta, telefon, material de canzelaria, paament del fit, sciudament, lumes, netijies, picoi lurieres de manutenzion); miorèr i alestimenc e la mostres temporanes; l trasport di materiai (per ejempie da esposizion o per la scenografia); cosć per l’arsegurazion; endrezèr material per slarièr fora e fèr reclam; fèr CD, DVD, material multimedièl e material didatich; meter a jir colaborazions con catalogadores, studiousc, enrescidores, operadores didatics, tradutores, interpretes, reladores e formadores.
L’Unità de miscion scempia (UMSe) rei etnografica di picoi musees ecomuseèla la vardarà fora la domanes manèdes ite e la ge darà i ponc aldò de tant che la corespon ai obietives che se met dant la lege, de la calità, prezijion e completeza del projet, de la sinergies metiudes a jir dessema ai etres musees o sic de enteres etnografich, del empostazion a livel de endrez e de aministrazion; del livel de autofinanziament pervedù. L contribut l vegn conzedù per no più che l 80% di cosć ametui e aboncont no l podarà asser per più che 6.000 euro. La domanes les cognarà vengir manèdes ite dant dai 10 de setember del 2023.
Traduzion di Servijes Linguistics e Culturèi del Comun general de Fascia