Mercoledì, 30 Agosto 2023 - 13:24 Comunicato 2507

Traduzione in ladino

Moena, pea via i lurieres de la strèda per jir a pe e co la rodes: nef pènt e tunel te la crepa

L President Fugatti: opera outa a la segureza de la jent

Pea via la realisazion de n nef toch de la rei dedichèda a la mobilità sostegnibola te Fascia: la conlearà l zenter de paisc de Moena co la strèda per jir a pe e co la rodes en esser fin aló dal raion sportif. L projet l perveit de mudèr fora l pènt e de realisèr n nef tunel te la crepa. I lurieres, che i perveit na speisa en dut de passa n milion de euro, i durarà un an e i é stac consegné enstadì dedant al President de la Provinzia autonoma de Trent Maurizio Fugatti, al Ombolt de Moena Alberto Kostner, al Procurador Giuseppe Detomas, al Conseier Provinzièl Luca Guglielmi e al Diretor del Ofize infrastrutures per jir a pe e co la roda Sergio Deromedis, che à metù ju l projet de l’opera. “Se trata de na scomenzadiva outa a la segureza de duta chela jent che cern chisc lesc per fèr sia raides a pe e co la roda, che ades cogn jir su la strèda che passa fora per paisc: l’opera donca l’à n enteres per l turim e per l ambient e la ge respon ai besegnes di sentadins” à despiegà l President Fugatti, dijan che te dotrei setemènes vegnarà consegnà ence i lurieres del toch de la strèda per jir a pe e co la roda de la Val de sora, toch con chel che se ruaurà a piz de la rei te Fascia. Ence l Ombolt Kostner à palesà sia sodesfazion: “Noscia comunanza la spetèa èrs che vegne fat chesta opera, per arsegurèr la segureza de duc e soraldut de chi più picoi. Te chest moment, defat, chi che va co la roda va sun na strèda olache, soraldut de sajon, passa n muie de auti”.

Un momento dell'inaugurazione dei lavori per la ciclopedonale a Moena [ Ufficio Stampa PAT]

La strèda per jir a pe e co la roda de Fiem e Fascia ades la conlea Molina e Poza, per presciapech 35,750 chilometres. L toch che passa fora Moena à scialdi soscedà problemes per chesta rejons: la strèda la se sorapeea col stradon e chest l é pericolous e n dejèje per chi che va a pe e co la roda, soraldut de sajon; problemes per l massa ert; by – pass del zenter storich.

L projet l perveit la realisazion de presciapech 1.254 metres de strèda per la rodes e per jir a pe, con doi corsies, una per jir en su e una per jir en ju. La ciarejèda la sarà lèria 3 metres, con da les pèrts 2 ores de strèda da amancol mez meter per man: se passarà timpruma da la man dreta e do da chela cencia de la Veisc. Donca vegn pervedù de mudèr l pènt che ades passa via la Veisc, de brees, con n nef co la strutura de acèl lènch 24,50 metres e lèrch 4 metres. L projet l perveit ence de ciavèr n nef tunel te la crepa lènch 21 metres aló dal Pont de Mur. Chesta opera la arsegurarà la segureza idraulica se l ruf l cognessa jir per sora, canche enlouta la strèda per jir a pe e co la roda la vegnarà serèda.

DAC TECNICH- AMINISTRATIVES PRINZIPAI
Projetist: enj. Sergio Deromedis
Diretor di lurieres: enj. Marco Sontacchi
Coordenador de la segureza endèna la Esecuzion: enj. Marco Sontacchi
Auta Soravèrda Lurieres: enj. Sergio Deromedis.
Responsabol del Prozediment: enj. Carlo Benigni
Firma che à ciapà l apalt: Zugliani S.r.l.
Suma per i lurieres: € 1.190.589,55 aldò de la basa de encant, de chi che € 128.461,55 per agravies per la segureza.
Suma de contrat: € 1.062.415,40 tout ite i agravies per la segureza, al net del rebas del 12,068%
Termin stimà per fenir i lurieres: aost 2024

DESĆÈRIA L SERVICE VIDEO https://shorturl.at/FMP68