Traduzione in cimbro
Legante in asfalto un di rige danidar hattma gemacht verte di arbatn zo richta in Laaz
Fugatti: “Mearar sichar un destrar a bichtegar bege vor di kamöüschaft un vor di turistn”
Pinn asfalto un pinn rige danidar atz 6 von prachant soinse gemacht verte di arbatn von earst toal auzzopezzra un zo betra in provintziàl bege 133 von Laaz, dar bege von “Kaiserjäger” von east bèltkriage, boda pintet di Valsugåna pittar zimbar Hoachebene, boda sa iz khent gemacht von ziklistn von Giro d’Italia vert 2022. Di arbatn håm gehatt ågeheft in bimmat von djar 2021, sperrante in bege un lazzanten offe a tiabas a bòtta lai vor khurtza zait vor di turìstn, asó azpe da håm gehatt gevorst di aministratör von lentar vodar Hoachebene un azpe ma hatt khött, lai vor in Giro. Dòpo z’soina offegestånt vor da bintar stadjong dar bege iz bidar khent gespèrrt atz 15 von madjo zo macha verte di lestn arbatn.
“Bar khönaz kontént von sèll boda iz khent getånt, machan mearar sichar un destrar in bege von laaz, nå in sèll bodaz iz khent khött saibe dar mångl von kamöüschaft bosen ågeat” hatta khött dar vorsitzar vodar autonome Provìntz vo Tria Maurizio Fugatti. “I bill khön vorgèllz Gott in tèknischen strukturn vodar Provìntz, in firme un in arbatar boda håm gearbatet aftz disan prodjèkt”. Richtn disan bege billz muanen gem a bichtega pintom vor di laüt un vor bazta ågeat in turismo aftz dise saitn. Dise arbatn helvan darzuar zo haba sicharne un destre beng in da gåntz Provìntz”.
Di arbatn håm gehatt ågeheft atz 6 von bimmat von djar 2021 betrante in bege inngrabante in kròtz un sichranten afte sait zuar in pèrge. Spetar di arbatn, asó azpe bar håm khött obar, soin khent augehaltet auz pan bintar von djar 2021-2022 un dena von 20 von madjo sin atz 5 von herbestmånat 2022.
In vorgånnate herbest soinda khent augemaurt di maurn pitt stachl botümm un gelekk di guardrail auz nå. ’Z izta khent nidargelekk dar asfalto un dar bege iz bidar khent offegetånt vor da bintar stadjong atz 21 kristmånat 2022. An lestn, von 15 von madjo vort, soinda khent gemacht di lestn arbatn zo riva au allz.
DI BICHTEGARSTN DATE TEKNÈSCH – AMINISTRATÌF
Plånar un dirèktor von arbatn : inz. Paolo Nicolussi Paolaz – dirèktor Åmt vo di beng - Apop – Provìntz
Koordinator vodar sicharhait antånto in arbatn: inz. Mauro Pontalti
Vüarar von protzedimént : inz Carlo Benigni Sostitutt Diridjént von Dianst vor di beng un di aisanpånen -
Apop
Firma boda hatt gearbatet: Zampedri Lorenzo s.r.l. - Pèrsan (TN)
In gåntzan toal 1: 844.000,00 euro
Arbatn zuargètt: 06.10.2021
Arbatn gemacht verte: 06.06.2023
Arbatn auzohalta di khnottn
Di arbat boda hkint bartz soin da sèll nidarzolega di spèrrn zo halta au di khnottn in gåntzan bartz khemmen zo khosta 130.000 euro, di arbatn bartn åhevan in månat von höbiat 2023.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
