Auz von sèll boda khütt ’z gesetz, di delibera haltet inn gåntz bichtege preskritziongen zoa azta di dianst “offegetånt” auzbene soin sichar un pitt groazan vorsicht. Daz sèll boda hatt auzgemacht di Djunta grundetze defatte atz date boda zoang “’z gepezzra vo mearare inditze boda khön ke di epidemì geat hèrta hintarbart in da gåntz Provìntz”. “Übarhaup – lestma in di note vodar APSS gekhluppet dar delibera – khinta geroatet an Rt von 0.75 pitt 120 kase alln 100.000 abitént; sidar 4 bochan zèrte paråmetre vodar epidemì – nummar von kase un Rt – gian hèrta pezzar ditza khütt ke bazma hatt getånt geat guat. In di ospedéldar di plètz vürgevånk soin nå zo giana behemme pezzrane siånka az iz allz ummaz bichte azta di laüt gian vür zo komportarase garècht zoa auzohalta di epidemì”.
Dise soinz di bichtegarstn regln boda soin khent ågenump boda – ma khöttz no a bòtta – ågian lai in dianst auzbene zo maga auzgem geèzza un getrinkha, in ristorént, gasthaüs, pizzerie, birt, pub, konditorai, ais, rosticcierie un åndre dianst boda soin azpe dise dena drinn pitt agriturisme un enoturisme o:
- Offe vo di 5.00 sin di 18.00 servirante afte tisch auzbene;
- Vor auzbene khinta gehaltet a platz auzzalt pitt daz mindarste drai saitn offe un sinkaso a dekhl; azta soin balustarn, vase vor di roasan boda auzhakhan in platz dise mochan nèt soin höachar baz 90 zm un mochan nèt abenemmen von air;
- Affon tisch auzzalt mangda sitzan lai 4 laüt, auz baz azza hebatn z’soina alle mittlebar;
- Di tischan mochan soin gelekk zo maga haltn daz mindarste an mètro bait zbisnen in klintn un in tischan. Disa baitom mage khemmen gemindart azta khint gelekk eppaz tra in tischan boda mage auhaltn in kontadjo; odar vor klientn von gelaichege tisch boda nèt mochan stian bait ummaz von åndar (ditza stat untar dar resposabilitét vo aniaglaz sèlbart);
- Ma mage nèt nemmen ’z geplèttra von bånko siånka azma sait auzbene;
- Ma mage nèt auleng in buffet;
- Di arbatar boda håm zo tüana pinn klientn mochan auhåm da kirurgesche halbmask un mochanen beschan mearare vert di hent (aniaglana bòtta bosa gian kanan tisch);
- Di klientn mochan auhaltn di halbmask alle di vert bosa nèt soin gesotzt zo tisch;
- Ma mage stian gesotzt zo tisch nicht mearar bar an ur una halba;
- Boda iz gelekk di kassa mochtada soin eppaz boda abespèrrt; ma mocht machan zaln daz mearaste pitt eltronische sitèm;
- Ma mocht putzan garècht bobràll, un nèt nützan mearare vert di gelaichegen ordenje azmase nèt mage disinfetàrn aniaglana bòtta (saltzar, ölar, uav). Vor di menù iz pezzarazza mang khemmen gelest online affon hånttelefón, odar azza soin palstifikart, un asó azza mang khemmen disinfetàrt aniaglana bòtta, odar pitt kart lai vortzodjukha;
- Ma mocht leng auzzalt o, geplettra zo maganen disinfetàrn di hent saiz vor di klientn saiz vor berda arbatet in mearare plètz o, übarhaup boma inntrete un zuar in apört boda mochan khemmen geputtzt mearare vert affon tage;
- Machan bizzan garecht baz ma sait drå zo tüana auzohalta in virus, boda mage khemmen vorstånt von auzlendar o;
- Bazta iz khent auzgemacht pittar meldung von 15 höbiat 2020 (visiara anvétze baz da kirurgesche halbmask auzbene, nützan di djornél, spiln boma mocht nützan sachandarn boda nèt mang khemmen disinfetart) iz nemear zuargètt;
- Di plètz auzzalt bart mochan khemmen hergerichtet vo naügom zo maga zuargem innzogiana un zo mövrase åna zo vennase in kartza vil pittnåndar un zo sichara azta di klientn mang stian an mètro bait ummaz von åndar.
Offetüanate auzzalt bèkslt nèt di regln bodada sa soin vor di ristorént, ma dise regln gian darzuar. ’Z stianda allz ummaz zuargètt di sèlln dianst bodada soin est innbene o, azpe di sèlln in vuaz von mense.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
