Auzolega a enerdjètik kamòuschaft gegruntet aftna kamòuschaft koopertìf hattmada ågeheft drauzoreda sa daz vorgånnate djar: an arbat boda hatt ångevånk vo züntrest, vürgevüart vodar kamòu vüarom pittar hilfe vodar Provìntz, durch ’z provintziàl Åmt vorz bazzar un di enerdjì, un vodar Federatziong von Kooperativan, un hatt ’z zil zo lega panåndar öffentlesche vüarom un prìvètt zo prodüra un zo nütza garade in lånt eletresche enerdjìa vo vornaügarum quelle. Est saitmada nå zo gerivada: in di bochan boda khemmen, defatte, barta khemmen augelekk in Trentino da earst enrdjètik kamòuschaft vo vornagarum enerdjì geböllt vonan Kamòu.
“’Z iz schümma khearn in a lånt un seng bazta iz auzkhent vonar arbat ågeheft vor mearara zait – dise soinz gest di earstn börtar von Tonina – in månat von madjo 2022 in okasiong vodar kamòu djunta vo Lavròu, hånne vorhoazt ke i hettat geschüzt da kamòu vüarom zo giana vürsnen auzolega a enerdjètik Kamòuschaft. Haüt, lai mindar baz a djar spetar, saibar sa da zo zoaga bazta iz khent getånt pitt disarn nètz; a bichtegar tritt ombrómm ma mage seng di frukte boda soin geraift ankunto dar arbat vo mearare, est heftma å z’sega di risultate. Di Provìntz arbatet aftn tèma von enerdjètik Kamòuschaft vo vornagarum enerdjì sa sidar mearare zait un, ankunto o dar mittarbat pinn Konsòrtzio von Trentinar Kamöündar, helft nå di kamöü vüarom boda soin interesàrt auzolega dise enerdjètik kamöüschaft. Darzuar, ankunto in protokòll untarschribet pittar trentinar Kooperatziong izta khent augelekk a tèknesche un rèchtliche task force boda hatt gevüart nidarzoschraiba an statùtt un zo vorstiana garècht allz bazta ågeat in Kamòuschaft Kooperativan un bia da mang soin gesek nå in rècht.”
Asó azpe da hatt khöt dar Tonina: “da enerdjètik Kamòuschaft iz a djüstar strumént zo geba mearar vèrt in lentar, übarhaup in lentar von pèrng; ankunto azta iz khent augelekk disa kooperatìf vor di kamòuschaft, Lavròu est izzen gesichart an groazan toal zukunft mearar un zoaget z’soina a lånt lente un guat z’arbata.”
In trèff dar djeneràl dirèktor vodar trentinar Federatziong vodar kooperatziong Ceschi hatt khött: “Da trentinar Kooperatziong izzese hèrta interesàrt aftn tèma vodar enerdjì, un in zèrte lentar iz a fondamentàl vortretar. ’Z soin kooperatìvan di drai eletresche konsòrtzie vo Stenico, Storo, un Pozza in Fassa Tal. ’Z iz ünsar interesse gem vèrt in lentar, helvante nå aniaglana form vo kooperatziong übar dar enerdjì boda innvånk di kamòuschaft. Vor daz sèll saibar hèrta starch nåmp in kamöü vüarom, in firme un in pürgar, di Federatziong iz boroatet z’arbata auzolega dise naüge kooperativan”.
An lestn dar Pürgermaistar vo Lavròu, Corradi hatt gemecht bia: “Di kamöündar mang soin protagonìstn auzolega di Kooperativan vor di kamöüschaft un di enerdjètìk kamöüschaft, zo risolvra zerte bichtege mångl, åhevante vodar enerdjì sin zo riva afte sotziàl pintom, khearante zo lega panåndar di laüt, kamòuschaft un kooperatziong soin di grunt stützan von Trentino. ’Z zil iz daz sèll zo nütza disan strument zo hèlva in lånt;leng panåndar kooperatìf vor di kamòuschaft un enerdjètik kamòuschaft iz eppaz naügez, bar hoffan az saibe a guatz baispil vor åndre kamöündar o”.
Übarsetzt von Schaltarle vor di zung von Toalkamou vodar Zimbar Hoachebene
