Traduzione in cimbro

Jouf de Fedaa, pea via la prozedures per meter a post e slarièr l “Pent del Peles”

L é stat publicà la prozedura negozièda per comedèr l “Pent del Peles” su la strèda statèla 641 del jouf de Fedaa te Fascia. I dac prinzipèi i é a la leta te la sezion “Avisc e Apalc – Garejèdes con envit” del sit de l’Agenzia provinzièla per i apalc e i contrac publics. La suma a basa de apalt la é de 1.585.584,63 euro, per i lurieres tout ite i cosć per la segureza, respet a n cost en dut de l’opera de 2.033.390,06 euro (la desferenza de 447.805.43 euro la vegn ca da la sumes a la leta).
“Chest intervent – despiega l president de la Provinzia autonoma de Trent Maurizio Fugatti – l é out a meter en segureza la strutura, tant per chel che vèrda la pèrts danejèdes, che per se parèr dal risech de teremoc e de levines”. “L apalt – va inant l president – l perveit na lingia de intervenc per miorèr l’infrastrutura”. Che fossa mudèr fora la strutura zentrèla che l é anter n pilèster e l auter con una neva de acèl e peton, fèr su na “parèda” auta 5 metres respet a la strèda, che la sibie bona de tegnir per mez tel cajo de na levina e stravardèr coscita i auti che passa. Estra apede slarièr la strèda delaite del viadot da 6 a 7 metres, con intervenc tant te la strutura zentrèla anter i doi pilèstres che te la strutures da na man.
“Ence chesta opera – disc amò Fugatti – la é outa a ge dèr maor segureza e efizienza a la rei de la strèdes che l é sul tegnir de la Provinzia. Gran atenzion ge vegn dat a la strèda che mena sun jouf de Fedaa e sun Marmolèda, sotmetuda al control da man de nosc sistem de Protezion zivila, e che dèsc ence l met de ruèr tel Venet”.