L argoment de la formazion didatica - outa ai ensegnanc de duc i degrees e ordegn, da la scolina enscin a la scola auta, e de desvaliva materies – l é stat apontin chel de la toponomastica, veduda desche element significatif de la valorisazion del teritorie, de sia interpretazion storica e geografica e scrign segur del lengaz e de la cultura del post. Ti inomes de lech se scon memories, colores, descrizions del teritorie e de sia morfologia, mizacoles de storia. L inom medemo de Fascia l disc fora na fascia de tera da poder coltivèr cernuda tel passà da la pruma jent che se à logà ju te chest raion.
Do dal benvegnù te Majon di Fascegn e la prejentazion de la scomenzadiva da man del Sorastant Federico Corradini, l é stat sobito avert i lurieres col intervent de Evleyn Bortolotti, funzionèra linguistica del Comun general de Fascia e coordenadora redazionèla del Dizionèr Toponomastich Trentin per “I inomes del post de Fascia”, e Vittorio Dell’Aquila, linguist espert de toponomastica de la Èlpes e de cartografia, che l ge à portà dant ai ensegnanc na chief de letura di inomes de lech ladins coi meter ite ence te n contest internazionèl. Sobito do i contribuc de Nadia Chiocchetti, funzionèra linguistica del Istitut Cultural Ladin “majon di fascegn”, Daniela Brovadan, conservatora del Museo Ladin e Alberta Rossi, bibliotchèra de la medema Majon di Fascegn e autora de libres per bec sul argoment, che i à portà dant tel orden la banches de dac de la toponomastica a la leta online e te Istitut, la doura potenzièla del argoment a unitèdes didatiches spezifiches, desche per ejempie chel de la Gran Vera te Fascia, e la publicazions per gregn e bec da troèr te la biblioteca spezialistica ladina. Cesare Bernard, storich fascian, à dat sie contribut de formazion di ensegnanc col lejer dal pont de veduda storich dotrei toponims ladins.
Per la Majon di Fascegn n’autra ocajion de esser apontin la cèsa recognosciuda de la cultura e de la identità propries e de dèr sie contribut per endrezèr dessema coi ensegnanc neves struments didatics da ge meter apede ai sacotenc percorsc jà sporc a la Scola fora per l an.
Rassegna stampa ad uso interno: Articolo da L'Adige - 12.03.2024
