Der projekt Bul (Banda Ultra Larga) ist kemmen gamòcht ver za verglaimern s onderst sai’ van digital divide van baisn saitn oder de saitn aus van stòttn ont gem de moglechkait en de doin platz aa za meing prauchen s glosfaser (Ftth as bill song Fiber To The Home), de peste as ist hait as en mòrk ver en gahasse ont stòrch. En Trentin ist Open Fiber s bèrk as hòt gabungen de òllgamoa’n prais va Infratel, as noch ist za mòchen gahasseger nètzn, gèltsgott aa en de zòmmòrbet pet Trentino Digitale ver za prauchen a toal strukturn as sai’ schoa abia de kablngruabn ont de knopfn va nètzn. Lai a nidera prozent van zòmmnètzn, iberhaup ver de sèlln haiser as nou mear isoliart sai’ ont mein nèt kemmen zòmmpuntn pet de glosfaser kimmp praucht de technologi radio ( Fwa as bill song Fixed Wireless Access).
Do ber gem de datn va biavle haiser as sai’ kemmen nai puntn zbischn hourneng ont oberel 2024: Andalo(299
haiser), Civezzano (2.018), Dimaro Folgarida (958), Mezzocorona (3.078), Palai en Bersntol (99), Rumo (108) e Segonzano (966).
Gèltsgott en de nain sim Gamoa’n, s òllgamoa’netz en glosfaser luckt en vurm Ftth ont Fwa 152 van 166 trentiner Gamoa’n: ver za sai’ ganau, de Gamoa’n as verkaft kemmen meing en Ftth (glosfaser finz kan haus) sai’ 149. En gònzn de sai’ eppes minder va 280 tausnt de trentiner van ausetparaichen as meing va schubet vrong za tea’ se u’hengen en gònz gahasse.
En de Autonome Provinz va Trea’t der projekt ist kostet 72 milionen va euro, ont der ist pet òllgamoa’gèlt zolt kemmen. S nai nètz bart plaim van òllgamoa’, ont Open Fiber bart s regiarn ont pahòlten ver zboa’sk jarder. An guatn stuck van nètz en glosfaser va Open Fiber laft turch de infrastrukturn (zan paispil de kabelnkanaln) as en de doin jarder paut kemmen ist va Trentino Digitale af bolten provinzallònt en an guatn vurm.
Abia tea’ ver za schòlten inn s dinst va de glosfaser en de baisn platz/ausetparaiche
Trentino Digitale hòt gamòcht de sait www.trentinoinrete.it en de beil as drinnsommelt sai’ òlla de nochrichtn iber en ausbaitern va de glosfaser avn gònze provinzallònt ont iber en de virm ver za schòlten inn s doi dinst.
Ver sèll as keart en projekt Bul ber denken as Open Fiber ist an operator “wholesale only”: der verkaft nèt dinstn ver de glosfaser direkt ver en leste kaver (lait oder bèrkn), ober s ist offet lai ver en groas mòrket as gibt s pau struktur en òlla de operatorn va telecomunicazion as gilte sai.
Ver za vrong der dins ver za surfen gònz gahasse, lait ont bèrkn van baisn saitn miasn zan earstn schaung benns s hòt segnal pet en sèlber hausnummer: dòs mu kemmen gamòcht as de sait va Open Fiber bou as miast kemmen tschim der adress as en link: https://openfiber.it/verifica-copertura. Benn der adress ist zòmmpuntn, der sistem gip de lista van operatorn as meing òrbetn en sèll dorf. S mu kemmen tscherlt sèlber oa’n van operatorn, riaven en ver za kontrolliarn as ist borèt as gea’t der dinst (dòs geat no en an iatn ònder politik hòndl), schiken de vrog ont vrong benn s hòt kostn ver za innschòltn ont grom. Der operator, ist gamiast za sèlber pintn de nètzn van pozzet va de glosfaser gamòcht va de Open Fiber finz en haus ver za paun s leste stuck ver za pintn s haus oder s bèrk en de nètz.
A vòrt verpuntn pet de nètz zbischn s haus ont der pozzet ont untertschrim der kontratt pet en operator der iter ist garift ont s mentschn bart meing nutzn van gahasse surfen finz as 1 Gbit/s.
Benn s kimmp araus van sistem as der sèlber hausnummer ist nèt galuckt ober de sèlln glaim bol, ist ganua longs bissn ont schraim s durch de sait va Open Fiber en link https://openfiber.it/contattaci/, bavai de database sai’ òlbe noch za vergreasern se.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
