La mencianza de profescionisć l é una de la costions più sentudes da la popolazion, a chela che i aministradores locai – che ogne dì i tol su i besegnes del teritorie – à volù palesèr. L’assessora Segnana l’à despiegà che la situazion la é dassen grieva no demò tel Trentin, ma te duta la Tèlia.
“L’Aministrazion provinzièla e l’Apss les se dèsc ju acioche l Trentin posse esser n teritorie atratif per i profescionisć sanitères, estra che soscedèr l gust e la gaissa di joegn envers la profescions da medico, infermier, oss, tecnich de laboratorie e c.i.: da chest pont de veduda la neva scola de medejina l’à na funzion fondamentèla” l à despiegà l member de la Jonta. L ent publich l é do a se dèr ju te desvalives ciampes per gestir na situazion coscita grieva, col se pojèr per auter sui ospedèi de val desche ressorsa strategica: l nef endrez de l’Apss l perveit de fat che ogne strutura sanitèra sie n referiment provinzièl per vèlch percors. L’Azienda la seghitarà a vardèr de soscedèr enteres ti profescionisć, col ge sporjer la mior condizions de svilup profescionèl, de benesser organisatif e de calità de vita. Per chesta rejon, i avisc de selezion i vegn porté dant fora da la provinzia ence col se emprevaler de media inovatives.
Ciavaleis, l é stat recordà – l é na ezelenza per l’ortopedia e dant da la fin del an la doventarà ence l pont de referiment per chel che vèrda i intervenc chirurgics ai muscoi pelvics, en colaborazion co la unità operatives de urologia, ginecologia e chirurgia generèla del ospedèl provinzièl. “Chesta Aministrazion provinzièla, dessema co l’Apss, la vel a chesta vida arvejinèr i servijes teritorièi e del ospedèl ai sentadins e arsegurèr na valivanza de azes a la cures” l’à dit Segnana.
Endèna la scontrèda l é vegnù fora besegnes e domanes dal pont de veduda sozièl e de la sanità. I rapresentanc istituzionèi i à sotrissà l’emportanza che à i teritories tel meter ju l nef endrez, fajan referiment soraldut al ospedèl de Ciavaleis e a la Cèsa de la sanità, col ge dèr luster e ge arsegurèr servijes de auta calità a duta la valèdes, tout ite cheles più dalonc dai zentres maores.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
