“I investimenc e la operes publiches l é na priorità per chesta aministrazion, che à confermà la gran atenzion envers i teritories desche Fascia e più en generèl, per la valedès enlongiajù la Veisc tras duc i intervenc programé” à dit l president Fugatti. “Una de la operes prinzipales per sie empat tecnich e finanzièl l é ben segur la varianta de la strèda de Cianacei e Ciampedel, pissèda per miorèr la calità de vita e la segureza per chi che se sposta tel toch più en ite de la Val: na opera che la Jonta à volù meter ite anter i intervenc strategics e per chela che sora n pech vegnarà nominà n comissarie straordenèr, troà fora, te chest cajo, te l’Aministrazion provinzièla, che arà la encèria de fèr acioche la fases de projetazion e de esecuzion les sie più spedientes”. L president Fugatti donca l à recordà ence i etres intervenc pervedui: la pèrt che revèrda più che auter la strèdes e la strèdes per la rodes e per jir a pe, sun chela che l é stat analisà coche l é do che va inant i lurieres, ma ence la ipoteses de la ferata, conscidran la dezijion de la Jonta de ge dèr su a RFI l studie de fatibilità per la “Ferata de la Veisc”.
L é stat analisà tel detai ence l projet del Bus Rapid Transit, l sistem per la mobilità publica sostegnibola pissà per Fiem e Fascia. BRT che – à prezisà Fugatti – “l é do che l va inant, con gran empegn e enteres soraldut per la pèrts enteressèdes de più dal gran event sportif. Na realisazion che va inant ensema co la compra di neves mesi ecologics per endotèr la infrastrutura de corieres a biometan e eletriches”.
Te la scontrèda l é stat rejonà ence di agiornamenc di lurieres per la strèda per la rodes: per l toch de Moena se spera de fenir i lurieres prinzipai dant da fin del an, enveze per Ciampedel-Cianacei i lurieres i cognessa fenir dant de la sajon da d’istà che vegn.
Sora n pech vegnarà publicà i avisc per la restruturazion del “Pont de Lejia” a Sèn Jan, opera finanzièda per presciapech 2,2 milions de euro, estra che per i lurieres per meter en segureza la strèda provinzièla 238 de Muncion (960 mile euro). Anterite va inant ence i lurieres per l pènt “del Peles” (2,3 milions), co la fin di lurieres prinzipai perveduda a la fin del an.
Te la scontrèda stata anter l president, i aministradores e l conseier ladin l é stat rejonà ence de la proponetes per integrèr de più l servije de trasport publich con impianc.
Estra che de la pèrt infrastruturèla, l é stat rejonà ence del problem del gran smendrament de la popolazion, del besegn de cartieres ence con referiment a la desponibilità sporta te val da ITEA, estra che del setor de la cèses condizionà dal marcià turistich. Argomenc conscidré de gran emportanza dal goern provinzièl, che revèrda dut l Trentin, descheche à recordà inout tinultima l president, che à sotrissà de voler ge vardèr con atenzion a la istanzes de Fascia tel chèder de la responeta de la Provinzia en cont del argoment cèsa e teritorie lurèda fora adum co la competenzes del assessorat ret da Marchiori.
Traduzion di Servijes Linguistics e Culturèi del Comun general de Fascia
