Traduzione in ladino
Eusalp endò al Trento Film Festival con doi neva scomenzadives
L pest “Quello che mi tiene qui” e i laboratories su la pèrt che à la eles te la storia e te la sozietà de la regions de la Èlpes
Dal 1952 en ca, la storia del Trento Film Festival la se à encrojà co la storia de la mont, che l é doventà en dut e per dut n laboratorie internazionèl su la cultures de la “teres autes”. Apontin per l valor recognosciù e fon che à la manifestazion, tel ambit de sia 71^ edizion, la Provinzia autonoma de Trent la met dant doi scomenzadives per pissèr e analisèr i mudamenc tel viver te la regions da mont, per jir inant co la esperienza metuda a jir da la presidenza 2022 de la Strategia europeèna per la Macroregion da Mont – Eusalp, che l Trentin à metù a jir adum col Sudtirol. Aldò di valores e di obietives porté dant da Eusalp, defat, vegn endrezà la seconda edizion del pest “Quello che mi tiene qui” e vegn metù ite tel program del Trento Film Festival doi laboratories per scoles e families, tel spazie T4Future, con n pensier su la pèrt che à la eles te la regions de la Èlpes tras l jech “Where are women in the Alps?”.
“Vedù l bon ejit che à abù l pest Eusalp del 2022, aon pissà de l portèr dant ence tel chèder de la 71^ edizion, ge dajan na atenzion spezièla a la tematiches de la sostegnibilità e de l’inclujion, ma fajan ence referiment a la possibilitèdes de lurier e a la pèrt che à la eles tel contest de la Èlpes. Ne prem n muie la situazion de emigrazion e de mencianza de ressorses umènes e imprenditorièles, ma pisson che sie n muie de rejons per restèr a viver e lurèr te na region da mont e l’èrt cinematografica pel esser na vida per fèr passèr chest messaje”: à dit l President de la Provinzia autonoma de Trent Maurizio Fugatti, che à metù a jir con n provediment formal de la Jonta provinzièla la seconda edizion per l pest, e l assessor provinzièl a la cultura Mirko Bisesti, che l tolarà pèrt a la juria del premie.
La juria la premiarà l documentèr o l film che l sarà stat bon de se arvejinarèr de più al sentiment che tegn su la Macroregion de la Èlpes, dintornvia la tematiches de la sostegnibilità, de la inclujion, de la colaborazion anter teritories, e che à desche argoment zentrèl la rejons che fèsc cerner la Èlpes desche lech olà stèr e per lurèr, en contrast co la emigrazion.
L apuntament col Festival, en program dai 28 de oril ai 7 de mé del 2023 perveit donca n moment dedicà a la premiazion del venjidor del premie Eusalp “Quello che mi tiene qui!” e i laboratories che tolarà ca passà, prejent e davegnir de la Regions de la Èlpes tras fegures feminines. I doi laboratories i vegnarà fac, descheche l é stat dit, aló da spazio T4Future te Piaza Fiera. Tel particolèr, ai 6 de mé del 2023 – da les 11:00 a les 12:30 – vegnarà endrezà na partida coi bec e co la families, enveze ai 5 de mé del 2023 da la 2 domesdì l jech l ge vegnarà portà dant a n grop de clasc de la scola populères. I laboratories i sarà rec da la ideatores del jech Stefania Santoni e Nadia Groff. L jech “Where are women in the Alps?” portà dant da sera ai 22 e ai 23 de november del 2022 en ocajion del “Annual Forum Eusalp”, l é n jech che ge somea a chel de l’aucia, da jièr en grop e l é stat pissà per ge dèr l met ai partezipanc de cognoscer la storia da zacan e d’aldidanché de la regions da mont tras la vita de 21 protagonistes, trei femenes per ogneun di set paijes che fèsc pèrt de Eusalp. La strategia europeèna per la Macro Region Alpina, de fat, la perveit la adejion de 5 Stac comembres de la Union Europeèna (Austria, Tèlia, Germania, Franzia, Slovenia), 2 Stac extra-Ue (Svizra e Liechtenstein) e 48 Regions a na vida paritetica.
Per info e enscinuazions: https://trentofestival.it/
Traduzion di Servijes Linguistics e Culturèi del Comun general de Fascia
(cdt)
Immagini
