Di etnografege musee, boda håm ’z zil hizohalta un zo geba vèrt allz in sèll boda ågeat dar kultùr von lentar, åhevante von folk traditziongen, un vür pinn dialèkte un pinn gebizza boda håm di laüt von lentar übar dar arbat vodar earde un von stèll, haltante kunt übarhaup von sèll sistèm zo redjra pittnåndar ’z geplèttra boda gehöart alln, un darzuar o di folk rituèll un di musìk; allz ditza, vor nummar un qualitét iz a bichtega kulturàl opfar boda gitt ünsar Provìntz. In di lentar augelekk, di mearastn vert lai vo laüt, khnöpf un feroine, dise musee soin haüt a bichtega okasiong zo maga gem vèrt in folk traditziongen, zo lega panåndar di laüt un zo macha schual.
Afte etnografege musee soindase sa gehaltet mearare öffentlesche trèff boda håm gezoaget in bichtege ruòl boda håm di feroine vor dise musee; åndre trèff bartnse haltn in di månat boda khemmen.
Khlummane musee, såmmelung, etnografege plètz azpe müln, smittheartn, sang, kasèlln, khalgruam soin khent geroatet ’z djar 2022 von Åmt vor da etnografege nètz vodar autonome Provìntz vo Tria. Åhevante von sèll boda auvarizkhent vo disarn roatom izta khent auzgemacht baz ’z bildada soin zo maga khemmen inngeschribet in roatordnung von etnografege musee vodar Provìntz. Dòpo zo haba ågenump di regln, bartnda khemmen augenump di vorsch innzoschraibase in roatordnung boda bartn khemmen inngètt sèlbart von etnografegen musee von lentar un von sèlln boda mang soin interesàrt. Spetar pittnar auzschraibung bartma mang åvorsan ’z gèlt boda iz mångl – 100.000 euro in gåntzan vor aniaglaz djar 2023 un 2024 – auzohalta di etnografege musee.
Übarsetzt von Schaltarle vor di zung von Toalkamou vodar Zimbar Hoachebene
