Di Provìntz, asó azpe da auzmacht ’z provintziàl gesetz afte kulturàl arbatn (p.G 15/2007) darkhennt di etnografege musee augelekk von lånt emtar, vo feroine odar lai von laüt sèlbart azpe emtar boda schützan di tradiziogen von lentar un håm azpe zil in sèll zuarzohalta un zo geba vèrt alln in sèlln sachandarn boda ågian dar kultùr, di traditziongen, in folklor, ma nèt lai di dialèkte, ’z gebizza von èkhar, von bisan un von beldar o. Asó, vorz djar 2023 di Provìntz bill auhaltn di prodjèkte inngètt von musee un von saitn boda håm an etnografe vèrt, inngeschribet in di liste boma hatt khött, un ågenump sidar khurtza zait pittnar determina von diridjént von UMSe etnografege nètz von khlumman musee un ekomusee, Giovanni Kezich. Dise emtar mang inngem in vorsch zo haba in schütz vor prodjèkte boda håm azpe zil in sèll zo geba vèrt dar kultùr von lentar.
Di prodjèkte mang ågian, baispil, drukhan un auzgem libadarn, inventarie, kataloge, tafln; sicharn da muséal sait; richtn un haltn da kunt di sachandarn odar da etnografege sait sèlbart; zuarhaltn, putzan, leng a pòst di ordenje; di organizatziong un di vüarom von saitn (ågestèllte, mittarbatar, vüar dianst, post, telefón, geplèttra boma nützt, zisan, haitzung, saübarn, khlummane arbatn); auzpezzarn di auzlegom boda stian vor khurtza zait; ummarvüarn geplèttra (baispil sachandarn boma nütz vor di auzlegom); bazma zert vor di sicharom; bazma zert vor reklåm; machan CD, DVD, multimediàl un didaktik sachandarn; bazma zert vor mittarbatn, katalogatör, studjös, nåsüachar, übarsetzar, inteprete, relatör un formatör.
Di UMSe etnografege nètz von khlumman musee un ekomusee bart nåschaung di vorsch boda soin khent inngètt un barten gem di pünkt nå bia sa pazzan pinn ziln von gesetz, vodar qualitét, pretzisiong un definitziong von prodjèkt, bia da soin gepuntet pitt åndre musee odar etnografege saitn, bia da soin organizart un vürgevüart; bia ma gloabet zo venna gèlt sèlbart. Dar schütz zuargètt mage soin daz mearaste von 80% von sèll boda khint zuargètt z’zera un mage nèt soin mearar baz vo 6.000 euro. Di vorsch mochan khemmen inngètt vor atz 10 von herbestmånat 2023.
Übarsetzt von Schaltarle vor di zung von Toalkamou vodar Zimbar Hoachebene
