Khreschrante hèrta mearar di laüt boda rivan in earste hilfe åna zo meldase, un haltante kunt ka da soin hèrta mearar di sèlln boda håm mångl z’soina kuràrt, izta gest mångl zo bèksla un zo pezzra bia åzonemma di laüt boda zuargian in earste hilfe. Di kòditze z’soina ågenump in earste hilfe khemmen zuargètt dòpo azta di infermìarn durch in triage håm geschètzt bia ’z steata daz khrånkh.
Vornaügrante bia ’z hatta zo khemma gemacht dar triage, di nazionàln linee håm azpe haupzil in sèll zo pezzra bia åzonemma daz khrånkh un bia åzoheva zo kuràraz pezzar. A bichtegar zil iz o dar sèll zo haba an triage sistèm allar gelaich in gåntz Beleschlånt, haltante kunt von naüge mångl boda håm di laüt vor bazta ågeat dar gesunthait, nå in sèll boda khint gezoaget von lest internatzional gebizzhait, un zo rispundra pezzar in sèll boda iz mångl est, vor di sicharhait von kure o übarhaup vor di sèlln laüt boda håm mångl z’soina geholft ombrómm da vennense hintargedjukht, asó makma schètzan pezzar baz zo tüana un sa von ånfång kuràrn pezzar ’z mentsch.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
