Traduzione in mòcheno
EUSALP: trasversaln kompetenzn ont òrbetmoglechkaitn avn pèrg ver de jungen sai’ de bichtestn punktn va de òrbetgrupp 3
En Scuol, en de Schbaiz, s hòt se gahòltn de òrbetsession van Executive Board EUSALP zòmm pet de koordinatorn van nain òrbetgruppn, en de beil as u’ganommen kemmen ist der òrbetplan ver de jarder 2023-2025 van òrbetgrupp 3 va EUSALP “òrbetmòrk, schualbèrk ont learbèrk”, koordiniart va de Autonome Provinz va Trea’t durch en Dinst ver de lokal sprochminderhaitn ont ver en europeische audit.
Der provinzal asesor en de schaul, universitet ont kultur Mirko Bisesti, as en 2022 delegiart kemmen ist en de presidenz EUSALP zòmmgahòlten va de zboa Provinzn va Trea’t ont Poazn, hòt tsòk za sai’ zavri’n ont hòt gagunt guata òrbet en de toalnemmer va de Gruppe, ont gahofft as de òrbetn as der plan vourschlong tuat, de zòmmòrbet zbischn de lender va de alpin macrostrategi versterchern tea’, durch de zòmmòrbet va òlla de bichtegen lokalspiler - òllgamoa’omtn, stòttkearn, bèrkn ont iberhaup de jungen. Der asesor hòt unterstrichen de bichtekait van òrbetn vourtschbunnen ver za giltn de soft skills en de glaiche zait pet de innbaich van europeische jor van kompetenzn en moi 2023: “S ist vourtschbunnen kemmen an vurm ver za vinnen ont schatzn de trasversaln kompetenzn as men en òrbetkontestn auganommen hòt, ont dòs ist a runt nais ding, ver de unsicherkait ver za definiarn, derkennen ont validiarn de doin kompetenzn, as, aa benn de sai’ komplementar en de sèlln professional ont noat ver za gea’ drinn en de òrbetbèlt, de plai draus va sèll as men za schual leart. Pet en doi speriment de Alpnregion mu’ kemmen an òrbetbèrk ver za paun an oa’nesistem as men prauchen mu ver za derkennen ont unterschraim de trasversaln kompetenzn”.
De doppelte transizion - grea’ ont digital - ist no za gem òrbetmoglechkaitn as vrong za paun naia òrbettschichter, s vernaiern se ont s bècksln se van òrbeter. En doi kontest, de riven ont de òrbetn vourtschbunnen va de Gruppe, hom abia rif der sèll za gem omport en de neat van alpinòrbetmòrk as gabèckslt sai’, ont de klòffen nèt lai en de jungen, ober en de groasn lait aa, pet programm va permanentlear (life-long learning), oa’ne pet de mission va de Gruppe “verpessern der òrbetmòrk, de schual ont de lear bou as noat ist”. De òrbetprioritetn hom drinn: der reklam van òrbetn u’gahenk en de professionallear; s u’nemmen ont s giltn van trasversaln kompetenzn; de noat za villn in der unterschitt zbischn gem ont vrog va de òrbet en de alpinregion, pet en unterstitzn de jungen za vinenn òrbetmoglechkaitn as no en sai’na bintschn gea’ ont pet en hèlven de òrbetgeber za tscherln en plòtz de peistn lait as òrbetn. De sperimentn barn se af drai bichtega punktn ver de insern lender konzentriarn - de holzbèrkn, de èsszaigbèrkn ont der turismus - as tschert kemmen sai’ avai de meing an guatn paitrog gem en de ringbirtschòft. De Gruppe billt unterstitzn de nain technologian aa, ver de schual, de lear ont de òrbet va vèrr, as hèlven meichet za gea’ keing en vortgea’ van pèrgplatz.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
