Traduzione in cimbro

Di taütschan zung kamöüschaftn in Beleschlånt soinse gevuntet atz Balt Naükhirche (Bosco Chiesanuova)

[Cimbro] Vor bintsche zait atz Balt Naükhirche, ummaz von zimbarn lentar von XIII Kamöündarn, iztase gehaltet da djar versåmmelung von Komitàtt von stòreschen taütschan zung inseln in Beleschlånt. Dar Komitàtt iz khent augelekk ’z djar 2002 un lekk panåndar emtar un feroine von 17 taütschan zung inseln bodase vennen durch in gåntz alpm raum von Aosta Tal sin in Friuli Venezia Giulia.
Dise kamöüschaftn håm mearare sachandarn boden gelaichan, natürlich aniaglana kamòuschaft hatt soi zung pitt soine khennzaichan boda soin gåntz interesånt vor di studjös. Defatte dise zungen, geredet no haüt zo tage, khemmen auz vo dajrhundartar bosase soin gemischt pitt åndre zungen un realtét bodase håm gemacht uantze. In djeneràl makma auznemmen zboa groaze khnöpf vo disan zungen: di sèlln boda abeståmmen von bairesche boma vennt in Friuli, Veneto un Trentino un da sèll alemanesch in Piemonte un in Aosta Tal.
Da djar versåmmelung iz an momént boma mage drauren afte problème boda pintn realtét bait vor fra de se gelekk in redjongen boda håm nòrmen gåntz åndarst fra de se.
Zbisnen in sèll boda khint hèrta getånt in dise okasiongen gedenkhbar ke haür izta khent besteteget di Anna Maria Trenti Kaufman vo Lusérn alz koordinatören un azpe sekretardjo dar möknar Leo Toller.