Di hilfe zuargètt iz sin afte 200 euro vor aniaglana månza gevüart zo pèrge (sin afte 40 stükh in gåntzan), vor a zait nicht mindar baz 70 tang zbisnen in earst von prachant un in 15 von herbestmånat. Ditza gèlt haltet kunt bazta zern di stèll zo vüara ’z vich zo pèrge, übarhaup daz sèll boda khint gezert z’zala in zis von pèrge un vodar khesar, un no daz sèll boma zert zo traga au ’z vich un allz daz åndar boma nützt zo haltaz aftn pèrge. Da soin ettlane di naüng sachandar inngevüart haür, åhevante von protzedùrn zo haba di schütz boda soin khent gemacht vil destrar un vodar hilfe sèlbart boda iz nemear geschètzt “de minimis”. Darzuar izta o khent inngevüart a klausl boda khütt ke azta ummaz odar mearare vichar khemmen geruapet un getöatet von groazan vlaischvrèzzar, dar schütz khint geroatet afte tang bosa soin gestånt zo pèrge, pellar, anvétze, azta iz vürkhent asó eppaz dar schütz in nèt khent auzgezalt.
Übarsetzt von Schaltarle vor di zung von Toalkamou vodar Zimbar Hoachebene
