“De bichtegen austrichtnòrbetn va de doi zait gea’ no en rif van an polizentregen spitol: de doi struktur bart an “switch” ver Trea’t ont Rovereto aa sai’, benn as de òrbetn van zboa spitelder u’vongen barn. De inser medizinschual bart de earste en Balschlont sai’ as nèt an sitz aloa’ hom bart, ober mearer en lònt, asou as òlla de spitelder toalnemmen barn ont de professionistn barn de referentn sai’ ver de jungen dekter ont de spezialisiarendn”, hòt tsòk Ferro, ont der hòt unterstrichen as schoa’ iaz bolten spezialisiarendn òrbetn kan spitol va de Bur, as unter sai’na stòrchen pinkt de diabetologi hòt.
Òndra bichtegen elementn va de struktur, asou abia as de viareren Atti gadenkt hòt, sai’ de maulchirurgi ver lait as nèt aloa’ veche sai’ ont de odontoiatri, s autea’ van nefrologesn krònkendinst pet òrbeter as lòk de dialisi mòchen en de turismuszaitn ver bem as en Trentin urlaub mòcht. Abia as gedenkt kemmen ist, en leiste jor ist augatu’ kemmen an krònkendinst va endocrinologi ont s ist no za kemmen paut an nain zentrum ver kopfbeateger as pet madesi’n nèt verpai gea’, pet en rif za kemmen an hub ver de doi krònket. Dernem en de doin òrbetn vinnt men de prossimitetmedizin, der onkologesn day hospital ver de chemioterapian ont de unitet ver de beategerterapi, ont nou de zòmmòrbet pet Villa Rosa va Persn. Zbischn de problem as unterstrichen kemmen sai’, ist as bea’ne u’stelltn hòt ont der tema va de attraktivitet ont va abia za hòlten de lait.
S spitol San Lorenzo hòt en gònzn 97 pettplatz ont en 2022 der hòt gahòp 2843 spitolisiarungen ont 1729 chirurgisn òrbetn, ont de zeiln van 2023 sai’ heacher (hait sai’sa 2005 de òrbetn). Kan earstenoatdinst sai’ gòngen 12433 lait, ont bichte sai’ de zeiln va de Operativunitet va radiologi, as en 2023 hòt finz iaz 24904 òrbetn gamòcht. De lònt assistenz Valzegu’-Primiero enteressiart 92000 lait ont zbischn de dinst as de gem s gip an projekt as runt nai ist ont as hoast “Aree interne Tesino”. Der projekt kimmp araus van a zòmmòrbet zbischn Provinz, Tsunthaitbèrk ont FBK, ont de tschbinnt vour za prauchen digitalplinder ver en telekontroll en de vòlln va ringa hèrzkrònketn ont der ist va kurz gabaitert kemmen en de diabetologi, asou as der krònket nèt òlbe en de tsunthaitstrukturn gea’ miast, ont asou der kimmp dena tschaut van dekter.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
Letrattdinst ont film gamòcht van Druckomt
Download van pilder do: https://bit.ly/3v2Hgbc
