“Ber sai’ vroa za hom do en de inser gamoa’ de Provinzaljunta - de beirter van pirgermoaster van Oachpèrg, Andrea Fontanari -. Der president boast as de amministrazionen van tol oa’ne gea’, bavai de sai’ bolten glaich ont hom de glaichen neat. De zòmmòrbet en inser Bersntol, de oa’nekait zbischn biar pirgermoastern, geat en de richtung ver za verpessern s lem en de insern gamoa’n, pet en versterchern van dinstn ont mear bèrt gem en de kultural, gschichte ont lòntschòft vourstelln. Strategische ist s verkear, ober der zil ist der sèll za sai’ kompetitiv ont attraktiv en 360° ver de nain generazionen, ont en de doin leistn jarder vil sai’ gaben de òrbetn gamòcht en de gamoa’schòft gèltsgott en paitrog va de Provinzaljunta. Ber bintschn enk an schea’n òrbetto, ont ber padonk enk schoa’ va iaz ver de òcht as der bart gem en inser lònt”.
Za griasn der president ont de provinzaln asesorn en de gamoa’ sai’ gaben bolten derstelltn van zivil, militarn ont lokaln vraischòftn autoritetn: de Asuc, de Karabiniarn, de Forestai, de lokal sezion van Alpinegruppe, de Vraibellega Pompiarn, de Pro Loco, der pfòff, don Romeo zòmm pet en koro ont der kindergamoa’rot. S sai’ gaben de pirgermoastern va Valzurg, Mirko Galder, va Vlarotz Lorenzo Moltrer, va Palai, Franco Moar ont da Garait, Luca Puecher.
Prope van kindergamoa’rot van Oachpèrg sai’ kemmen gem ausòndra grias en de Junta, pet en kloa’pirgermoaser Francesco as s hòt galesn en president de grias va guat kemmen ont hòt se padonkt pet de provinzaln ont lokaln amministrazionen ver sèll as de barn tea’ ver de lait ver za mòchen sa plaim za lem asn lònt.
Bail de beirter van zboa junte, der pirgermoaster Fontanari ont de vicepirgermoaster Luisa Moser, zòmm pet de gamoa’junta, hom galòk schaung en president Fugatti ont en de asesorn de òrbetn as u’pfònk kemmen sai’ asn lònt, pet ausòndra beirter ver en Projekt Borghi van PNRR, ver de beiln as sai’ kemmen zuazoln gem ver 20 milionen va euro ver za gem bèrt iberhaup en lònt va Palai en Bersntol ont en Bersntol. Der pirgermoaster ont de vicepirgermoaster hom vourstellt en de Provinzaljunta a toal projektn ont naiòrbetn, va de kultur finz as de verkear, van zòmmlem asn turismus, as de beiln as sai’ schoa’ kemmen gamòcht a toal suachen ver za meing sa mòchen - pet de oa’nekait van gamoa’n glaim - as de Provinzaljunta hòt verhoasn za kennen sa pesser ont schatzn sa.
Der to ist garift pet de unterschrift van president Fugatti ont der pirgermoaster Fontanari asn a pergamen ver za denken der to, ont pet an geschenk ver za padonkn se ver za sai’ glaim en de gamoa’ van Oachpèrg ont en tol en president va de Provinz.
De vrong en pirgermoaster van Oachpèrg
De vrong konn men schaung asn doi link
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
