Dar asesór vor di gesunhait, di sotziàl politike, bohintarhait un famildje vodar Provìntz hatt khött bia di epidemia hatt gebèkslt ünsar lem vo alle tage: “Dar Covid hatt gezoaget ke di lentar auz ar a bege, von pèrng soin eppaz guatz vor alle, nützan vor djunge laüt haüsar boda nèt soin genützt iz khent z’soina eppaz gåntz bichte. Ombrómm ditza gitt zuar in djungen famildje zo maga soin autónome un darzuar nåzohelva in lentar von pèrng sèlbart”. Dar Asesór hatt dena gedenkht in starch schutz boda di provintziàl Vüarom hatt gètt disan prodjèkt boda hatt gelekk panåndar mearare laüt “un gitt zuar zo macha vürgian di khlumman lentar von pèrng un darzuar gitt a hånt in djungen”.
Dar Diridjént von provintziàl Åmt vor di famildje un vor di djungen, Luciano Malfer hatt khött von groaz interese boda hatt gemövart disar prodjèkt pitt “mearar baz hundart vorsch vo informatziongen dar 10% vo auzlendar, 11 vorsch sa inngètt, vo disan a famildja vo taütsche o”. “Bar håmse gehoazt – hatta khött dar diridjent – voll ekonomì; asó azpe sa åndre vert iz khent getånt, ’z iz genumma übarleng affon sky family, afte traspòrte, afte musee boma mage inngian pittnan spetziàl prais, ankunto dar Euregio Family Card. Disar bartz soin dar argomént von Festival vodar Famildja bodase bart haltn ka Tria von 30 bintmånat sin atz 4 von kristmånat.
Guate börtar vor in prodjèkt soinda khent khött o von Vorsitzar vo Itea un dar Pürgermaistar vo Lusérn hatt khött ke dar zil iz dar sèll “zo sterchra ’z lånt pitt mearare laüt un asó nå håm mearare dianst o”. Dar prodjèkt mage khemmen ågenump vo åndre lentar o segante ke åndre pürgermaistarn von Trentino soinse interesàrt. Dena di Vorsitzaren von Toalkamou hatt geredet vo alln in stèpfln boda soin khent gemacht vor disan prodjèkt un boda hatt gevuntet soin platz in Arbatprogråmm von Famildja Distrikt 2019-2020 un iz gerift aftz soin hauppunkt untarschraibante in Akòrd zbisnen alln in sèlln boda nemmen toal, si o hatt gemecht ke vil håm gevorst von auzlånt, “Taütschlånt, Österraich, Argentina un Usa”.
An lestn di Laura Ravanelli un di Valentina Chizzola vodar Stiftung De Marchi håm geredet vo “generatìf welfare” vo disan prodjèkt boda bill innvången di laüt pinn lånt, di Antonella Rovri von provintziàl Dianst vor di Haus Politike hatt geredet vonan bege zo halta di laüt afte pèrng.
In prodjèkt nemmenda toal dar Toalkamou vodar Zimbar Hoachebene, dar Kmaou vo Lusérn, Da Autónome Provintzvo Tria – Åmt vo di Famildje un di djungen, Åmt vo di haus Politike von Dipartimént vor di Gesunthait un sotziàlpolitike – Stiftung Franco Demarchi un Itea spa.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
