De drai konkursn sai’ augòngen ont hom se verraichert pet de zait. Konkursn lai ver zoachen as gahòp hom s zil za hèlven en de schual za gem bèrt en sèll as do hòt, en de kultur- ont sproch- pahalter as de bersntoler gamoa’schòft hòt, sai’ arauskemmen van Institut schoa’ en de 90er jor. Van earstn jarder van Zboatausnt hòt men gabellt pesser strukturiarn de òrbetn zòmm pet de schual ont asou ist augòngen en 2003 der konkurs ver de studentn as ober nou mear as ònderst s zil gahòp hòt za gem bèrt en de gschicht ont en de kultur va de bersntoler gamoa’schòft. Schoa’ zboa jarder derno der konkurs ist kemmen gamòcht ver de schualer aa ont hòt se òlbe mear keart za gem bèrt en de tschrim sproch aa bavai s ist òlbe mear pakònnt kemmen de schrift standard iberhaup en de schual. Enderbail de technik ist envire gòngen ont s ist òlbe laichter kemmen za meing mòchen selber filmen ont asou ist kemmen arausgem der konkurs Filmer bo as pfrokt kimmp en de stimm ont en de dialogn za prauchen mear as ònderst s bersntolerisch. De zaitn sai’ raif kemmen ver za prauchen òlbe mear de schrift ont asou ist arauskemmen der konkurs Schrift ver za unterstitzn ont veròrbetn tèkstn as derstelln an earstn tritt ver a bersntoler- literatur.
De inizitf ist kemmen òlbe unterstitzt va de Autonome Region Trentin-Sudtirol.
