’Z soinz: dar Maso Michael an alpinar struktùr abezolirna di ågestèllte von groazan firme, biodinamische koltivatziongen un zo geba herbege, di Paola’s Herbs a bèrkhstatt boda macht kosmètike nützante bazta gitt dar balt un Prukaren a turistìk firma augelekk lai vo baibar.
Alle dise firme soin starch gepuntet pnin lånt un haltn azta dar pèrge un da zimbar earde habe an groazan vèrt vor di arbat bosa bartn vürtrang.
“Bar mochan auzdrukhan modèrn ünsar spetzialitét – hatta khött dar Asesór von Lånt Entn – un Lusèrn iz sichar a mustar vor ditza. Ünsar autonomì redjartze afte resposabilitét, nèt lai zuar in åndarn ma zuar üs sèlbart o. I da atz Lusérn sige khummane ort dar hatt lai daz schümma. Haltn Lusérn asó azpe ’z iz, iz a zil bobaraz mochan vürstèlln. Bar håm zornìrt vor ditza Lusérn vürzotraga prodjèkte boda soin auvarkhen von Stati generali della montagna. Disar prodjèkt iz sichar a bett gebunnt un hatt an groazan vèrt vor alle. Bar mochan o arbatn zo macha verte di nètz in fibra boda, azpedaz hatt gelirnt daz sèll bobar håm gelebet untar Covid iz a groaza chance vor di pèrng. Di arbat vodar Provìntz vor Lusérn höart sichar nèt au hoint abas. Bar bartn gian vürsnen z’arbata zoa azta di laüt mang gian vür zo leba da.
Di lentar mochan khearn z’soina dar zentrum vodar autonomì, nèt kontra in stattn ma pittnåndar pinn stattn un aftz ditza saibar nå z’arbata”.
Haüt di naüng impreditör soinse gevunet pitt åndre firme boda magatn arbatn pittnåndar pinn Istitutziongen boda soin interesàrt auzohalta di arbatn, pinn bånke, pinn stiftung, pitt APIAE un no pinn Dipartimént Agrikultur vodar Provìntz, di APT un Confidi.
’Z djar 2018 atz Lusérn håmda gelebet 262 laüt, boda soin gemindart von 25% in di lestn zbuantzekh djar vor ditza hattma gesüacht zo tüana garade eppaz zoa azta ‘z lånt nèt stea ler, atz ummana helftma nå zo venna haus in lånt un atz d’åndar abezolirna di laüt auzolega naüge firme pinn prodjèkt “Vor a naüga zimbar zukunft”.
Dar prodjèkt iz khent vürgetrakk in drai stèpfln: in an earstn momént atz Lusérn hattma gelekk panåndar an khnopf laüt boda bölln auleng naüge firme, laüt boda soin khent zornìrt pittnan öffetleschen bando, dena aniaglana firma iz khent draugeschauget un gevüart panar hånt zo vorstiana pezzar baz di bill tüan. In draite stèpfl boda iz khent gemacht atz Lusérn di naüng imprenditör bokhennen berda bill auhaltn dise naüng firme bodase bölln innsetzan atz Lusérn.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
