Traduzione in mòcheno

As de 17 van òlderhaileng en Palai en Bersntol zòmmtrèff as “Minderhaitn ont ausbònder en Trentin zbischn Mittlelt ont Modernzait”

An to va gschicht-sprochlear offet en òlla de lait, bou as barn toalnemmen bekonnta voursetzer as barn klòffen van taitscha gruppn as kemmen sai’ as de lòntschòft bou as iaz ist de provinz va Trea’t: der zil ist der sèll za mòchen kennen  an ettlena taitscha ausbòndern en Trentin zbischn de mittlelt ont de modernzait, iberhaup no za hom naia suach gamòcht iber de gschicht ont de sproch. 
Der zòmmtrèff as bart se hòlt as de 17 van òlderhaileng va um naina en de vria en Gamoa’sol va Palai en Bersntol, ist organisiart van Bersntoler Kulturinstitut ont mòcht toal van projekt “De kròft va de minderhait: s bider augea’ van a taitsches dorf as de sud sait van Alpn” van ver za kennen pesser de gamoa’schòft va de sait va de sproch, va de gschicht, va de antropologi ont van sozial, pet de zuazoln van PNRR.
Der bart u’riarn drai temen: de identitet en de alpn (Mittlelt); birtschòft, kultural ont sproch gamoa’schòftn en de insern zaitn; storische-sproch aussichtn, abia as de gschicht hòt gabèckslt de sprochminderhaitn.