Portèda dant te n percors temporèl e tematich, la mostra vel ge sporjer n develpai a duta chela jent che te chisc egn à didà a meter sù l Museo Ladin, no demò se tolan del temp, ma soraldut se dajan jù con gaissa e gust per l mantegniment e l sparpagnament de la cultura ladina. L dialogh col vijitador l seghita enscin a la fin del percors, che l se sera sù co la proiezion del video “Musc e oujes del Museo” n mosaich de persones che conta che che vel dir se sentir ladins anchecondì delaite de n spazie che somea n cantier, olache se pel lascèr n messaje e pissèdes neves per l davegnir del Museo. Na vijion de chel che l’é stat, che l’é e che doventarà l Museo ladin de Fascia, fata de maor condivijion e interazion col teritorie, aldò del moment de festa “mia majon, mia storia, mia parlèda”, acioche l’Istitut cultural Ladin ence tras l Museo, seghite a portèr inant con respet e gaissa l prezious lurier de stravardament, ma tel medemo temp che l se aure amò de più a la jent, a na vida che ogne un de nos posse sentir sia la realtà che chesta istituzion raprejenta.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
