’Z Åmt vor di Arbat vodar autonome Provìntz vo Tria – pittnåndar pitt ASAT, Confesercenti, Confcommercio, Emtar vor in turismo, Cigl, Cisl un Uil – hatt ågeheft auzolesa kandidatùrn zo venna laüt boda soin interesàrt z’arbata untar dar bintar turistìk stadjong 2023/2024 zoa zo machase bokhennen pinn hotèln boda süachan sött arbatar.
Di laüt boda soin interesàrt mangse kandidàrn vor di arbat boden pazzt pezzar, nå in sèll bosa håm getånt sin haüt, un asó khemmensa inngeschribet in di liste turismo, un berda süacht arbatar åzostèlla – pittar hilfe von Åstèllung Zentrum un von feroine vo kategorì – mage aunemmen garade vo disarn liste un vorsan laüt qualifikàrt.
Disa initziatìf in di djardar izzese gegruntet hèrta mearar ankunto o in protokòll boda iz khent untarschribet sa ’z djar 2020 un vornaügart ’z djar 2021. ’Z zil vo disan protokòll iz daz sèll zo macha krescharn di ågestèllte boda arbatn in sektor von turismo opfrante laüt hèrta mearar abegelirnt un boroatet, zoa azta dar turìst boda zuarkhint mage lem an esperientz bodar nemear vorgèzzt un asó khearn hèrta in da ünsar Provìntz auzzomacha di bintar ferie.
Di profìln boma süacht vor disa turistìk stadjong gian von sèlln boda servìrn in di khuchl, åzonemma di laüt, vor in bar, afte piåne sin afte sèlln boda nåstian in wellness.
Bia ma kandidartze:
dar arbatar boda berat interesàrt makse kandidàrn auzvüllante in formulàr, gianante nå in informatziongen boma vennt afte websait von Åmt vor di Arbat, odar rüavante in Arbat Zentrum, odar in Arbat Åstèllung zo haba hilfe un schütz.
Di kandidatùr bart khemmen gemacht håm in Feroine vo kategorì von turismo un alln in sèlln boda süachan arbatar vor disan sektor, asó makma khemmen gerüaft garade von arbatgebar odar von Åstellung Zentrum zo redada drau.
Bia ma tüat zo vorsa arbatar:
Di arbatgebar mang vorsan di nem von arbatar boda bölln arbatn in disan sektor durch in Astèllung Zentrum odar durch di Feroine vodar kategorì. Zo bizzasan mearar bia åzovorsa arbatar iz genumma gian afte sait vodar websait von Åmt vor di Arbat, augelekk lai vor ditza.
Hèrta nå in bege z’arbata pittnåndar zbisnen Åmt vor di Arbat un Feroine vodar kategorì magatz soin azta khemmen gemacht no åndre prodjèkte un reklåm spetzifege nå in mångl vo arbatar boda håm di firme.
Zo haba mearar informatziongen gea z’sega fte sait augelekk lai vor ditza vodar websait von Arbat Åmt: https://www.agenzialavoro.tn.it/TESTI-AVVISI/IL-TURISMO-ASSUME
Übarsetzt von Schaltarle vor di zung von Toalkamou vodar Zimbar Hoachebene
