“En Trentin, as ber bissn as s hòt a kompliziareta lòntschòft – sai’ gaben de beirter va de asesoren Segnana – hòt s u’gefèr vinfhundert lait as derkennt sai’ abia toaret, gèltsgott en doi projekt, u’gaheift vour a jor, tea ber gem de moglechkait za vergreasern de òllgamoa’dinstn durch an organisiaretn ont bichtegen inntritt. A benns nou de groas noat nèt garift ist, de doi naiòrbet ist moglech gaben bavai s hòt a groasa zòmmòrbetn gahòt zbischn de òllgamoa’dinstn ont de vraischòftn as asn lònt sai’ ont ver dòs ist moglech gaben za paun au a hilf ver de lait as noat hom durch an òrbetnètz gamòcht va lait ont zuazoln as kemmen gem sai’ ver de òllgamoa’schòft”.
De president Grigolli hòt klòfft van an “projekt as mear enkeing geat en de lait as toaret sai’ ont meing mear sèlbstende sai’ durch de moglechkait za tschernen benns hom de ibersetz va de LIS oder van untertitln”, der viarer Ceccato hòt unterstraicht as s ist an bichtegen be “zòmmtschbunnen pet de sèlln as barn prauchen der doi dinst durch de technologi asou ver za mòchen nèt zait verliarn en de ibersetzer ver za gea’ dur ont her”.
Ver za vongen u’ der doi projekt sai’ kemmen organisiart mearer trèffn pet de u’stelltn van sprochtirler as sai’ as de lòntschòft ver za learnen mearer virm za prauchen benn as men hòt za tea’ pet de lait as toaret sai’. Zbischn merz ont moi 2022, òchsk u’stelltn va de autonome Provinz va Trea’t, va de Tolgamoa’schòftn, va de Gamoa’n ont va de Universitet va Trea’t hom toalganommen en secks stunnen va u’lear as de sòchen as kearn s nèt hearn, van klòffzai’ ont de virm ver za hèlven durch de Balsch sproch van zoachen.
En de glaiche zait sai’ kemmen kaft kan a visk tablet ver de òllgamoa’omtn, ver za gem a hilf en de lait as nèt hom aigena innrichtn ont asou versterchern der ibersetzdinst.
De lait barn se miasn u’mèlln durch an App Toaret Sprochtirl, as men mu’ loa’n umensist van store, ont meing asou hom an vèrr ibersetzer va AbilNova ont ENS Trea’t, as bart se u’hengen en videokonferenz ont bart ibersetnz as de sproch van zoachen de nochrichtn as bart en gem s mentsch van òllgamoa’omt. Men bart se miasn u’mèlln en de 48 stunnen vouraus bail de stunnen as der omt offet ist van ma’ta finz en vraita.
Der vourprojekt bart riven en rif van jor 2022. Pet de datn as barn auser kemmen va de sperimentazion bart men tschbinnen abia za gea’ envire za organisiarn der disnt.
Zuagahenk de grafik.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
