![](/var/002/storage/images/media/immagini-comunicati-stampa/mostra-records-image3/3737346-1-ita-IT/Mostra-Records_imagefullwide.jpg)
«Dar sport iz nèt lai bazta tüat dar laip – hatta khött dar Pürgermaistar vo Tria Franco Ianeselli – dar sport iz sidar hèrta emotziong un kultùr: kultùr vodar arbat, vodar fadige, vor di rèchte un vor in respèkt vor daz åndar. Vor daz sèll gloabe az saibe leblich nemparse disan Olimpiadi 2026 pitt initziatìvan guat zo kontara in khèrn von spòrt, boda iz ja rèkord o, ma ’z iz übarhaup khennen un ånemmen soine ort, un vor ditza dar spòrt hatt an groazan pedagogeschen vèrt darzaur inan sotziàl vèrt, dar helft z’stiana pittnåndar, zo nütza azpe ’z hatt z’soina di öffentleschen struktùrn, zo höarase toal vo eppaz gröazarz. “Anelli di congiunzione” iz asó dar djüst titl vor initziatìvan boda zuargem zo riva in hèrtz von spòrt, vorstìan aniaglaz töale un allz panåndar o, auhaltatnse aftna aniaglana biorgrafì, aniaglan rèkord, von sèlln sachandarn boda håm gemacht groaz da olimpesche stòrdja. Paitante azta tra zboa djar djüst khemmda geschribet an åndadar schümmadar kapìtl».
«Initziativan azpe dise – hatta khött darzuar di vitzevorsitzaren un asesören vor in spòrt Francesca Gerosa – boda pintn panåndar laüt, kamöüschaft un bèltn gåntz åndarst tra de se machanaz stoltz. “Anelli di Congiunzione” pittar auzlegom Records no a bòtta macht von Trentino in mittlpunkt vodar bèlt, ombrómm Olimpiadi un Paraolimpiadi machan khennen dar gåntzan bèlt ünsarne lentar vor allz daz sèll bosa soin guat zo tüana. Dar titl “Anelli di congiunzione” haltet inn mearare sachandarn, pintet daz sèll boda iz gest inar bòtta pitt haüt, schaugante hèrta vür zuar in sèll boda no mocht khemmen, groaze un khlummane, sinnenn vo laüt åndarst tra de se, khempfgaist pittar sèlln fraiböllege arbat boda iz dar grunt von ünsar spòrt sistèm un nèt lai von sèll. I vors alln zo leba dise zboa djar bodaz bartn vüarn zuar in Olimpischen Spiln pinn lust z’soina stoltz z’soina toal vonan lånt boda bart soin gedenkht vor hèrta.
Dar diréktor vodar Stiftung Museo Storico Giuseppe Ferrandi khütt belz ’z bart soin ’z zil vodar initziatìf: «Azta Anelli di Congiunzione – hatta zuargètt dar Ferrandi – bartaz vürn sin afte Olimipeschen un Paraolimpischen Spiln 2026, Records iz da earst vo drai auzlegom boda ågian ’z gemèzza, in laip, di zaitn, un ’z geloava. In di “Galleria Nera” venntma matardjél zo vorstiana pezzar di vèrt von Olimpischen un Paraolimpischen Spiln. Disa iz nèt an auzlegom azpe alle di åndarn: da makma vennen emotziongen, schaung bait, seng un vorstian di date vodar olimpischen un paraolimpische stòrdja azpe ma nia hatt gemak tüan pinn data storytelling».
Da soin 14 di sektziongen vodar auzlegom boda bartn zuargem in laüt boda gian z’segase, durch di 300 mètre vodar “Galleria Nera” zo khenna aniaglaz sachan boda ågeat in Spiln: vo balsa håm bidar ågeheft di earstn djar von ’900, aftn Pierre De Coubertin, afte pintom zbisnen Spiln un politika, afte olimpischen ideàln boda håm gevüart zo macha konkrètege arbatn, vodar stòrdja von Olimpiadi afte tele un radio reportage sin afte sait gepuntet garade pinn spòrt. In di sektziong “Time” khinta gezoaget bia ma nemp abe di zaitn, in “Speed” mezztma bettane tipe vo “velocità” ’z soinda, “Body shape” zoaget in laip von atlete zbisnen djenetika un training un, an lestn “Body” lazzt seng bia di bizzschaft ume dise sachandarn iz nèt vor alle gelaich ma di mocht soin gemacht pazzan aniaglan atlèt.
Di auzlegom Records bart offestian daz gåntz djar 2024 von erta aftn sunta (orario 10.00-18.00). Di “Gallerie” soin offe vor alle un åna zo mocha zaln. Mearar informatziongen makmase venne afte websaitn www.provincia.tn.it un www.museostorico.it.
Pildar von Press Åmt
Service video > https://bit.ly/42sUDOA
Übarsetzt von Schaltarle vor di zung von Toalkamou vodar Zimbar Hoachebene