Personal calificà, posć let, patologies dalbon ries di ghesć e besegn de meter a jir desvaliva formes de suport e assistenza no demò te la RSA, chisc l é i problemes che à portà dant duta la strutures endèna la scontrèdes.
“L é argomenc che à de besegn de n lurier de sistem e trasversèl fat da più assessorac, de na colaborazion istituzionèla a più livie e partezipazion ativa del volontariat sozièl, de la comunità e ence del privat”- à dit amò Tonina.- “Bensegur l tem del personal l é emportant, e la soluzion l é n recognosciment economich adatà, ma no demò. En cont de duta chesta costions, ti meisc che vegn proaron a ge dèr responetes prezises a ogne realtà aldò di besegnes spezifics porté dant, ma ence a fèr consciderazions più de sistem e de prospetiva da spartir con duc i referenc de la strutures”.
Te la pruma scontrèda stata da bonora, la delegazion reta dal assessor Tonina la é stata a San Giovanni di Fassa-Sèn Jan. À tout dant la Presidenta de l’Apsp Barbara Bravi e la diretora, Elisa Emiliani, l Ombolt de San Giovanni di Fassa-Sèn Jan Giulio Florian, l CdA del ent e dotrei raprejentanc di ghesć. Endèna la vijita l assessor Tonina à vedù la strutura che ge dèsc alberch a sessanta ghesć e che l an passà à fat festa per l vinteisem cedean de atività. La presidenta e la diretora ge à dat luster ai elemenc de prijie de la strutura e i ambic sun chi che se cognessa entervegnir, scomenzan da dotrei operes de miorament e de modernament. A livel de endrez, l é stat portà dant l problem de troèr personal calificà e la logazion periferica, ensema col besegn de proèr a sporjer servijes de enjonta e de integrazion respet a chi residenzièi.
Tonina do l é jit te l’Apsp San Gaetano de Pardac, olache l é stat tout dant dal President Renato Cemin, dal diretor Maurizio Belloni, dai comembres del CdA, dal ombolt f.f. Giovanni Aderenti. À tout pèrt ence i raprejentanc del volontariat e di ghesć, che anchecondì i é passa 80. Chiò l é sutà fora la gran emportanza de aer na comunanza che stèsc apede, ajache la cèsa de paussa la é tel zenter del paisc, e soraldut l é stat valorisà l ruolo del volontariat, dalbon atif e che l fèsc acioche la sojornanza te la cèsa de paussa la sie più piajegola.
L é stat sotrissà l’emportanza de la prevenzion, de tor ite i joegn te percorsc per tor consaputa del valor che à engaissèr i manco joegn a esser atives, del esser jent de età e del volontariat te chisc ambic.
A Tieser, l assessor Tonina à scontrà chi che rec la cèsa de paussa Giovanelli, strutura che tol dant presciapech 70 jent. L president Giovanni Zanon e la diretora Roberta Bragagna à portà dant la situazion de la strutura e la endesfides a cheles che l CdA cogn ge fèr front. Dantdaldut l é stat recordà la veia strutura, che dal 2017 la vegn durèda pech e sun chela che l é stat domanà de se fèr n pensier adum co la Provinzia per poder la valorisèr miec che l é meso aldò di besegnes del teritorie, ma ence la fadia a troèr infermieres, e chesta mencianza fèsc doventèr senestra no demò la gestion ordenèra, ma ence la programazion. À tout pèrt a la scontrèda estra che l CdA de la cèsa de paussa ence l assessor de comun Marisa Delladio, i raprejentanc de la Magnifica Comunità de Fiem e di parenc di ghesć e l coordenament di servijes sanitères de la strutura.
Se à serà chesta dì co la vijita a la Residenza Sanitèra Assistenzièla de Lisignago che la é de la Comunità de Val. A tor dant l assessor Tonina l era l president de la Comunità de Val, Simone Santuari e la Ombolta de Cembra Lisignago, Alessandra Ferrazza, apede a la pèrt gestionèla co la presidenta de Spes – la coprativa sozièla che gestesc la strutura – Paola Maccani, l Diretor generèl, Italo Monfredini e l diretor de la strutura, Manuela Demaria.
L assessor Tonina à despiegà che “per poder pissèr a de neves percorsc ge vel che ge vegne fat front a chisc argomenc al scomenz de la legislatura, per perveder politiches che vae envers al davegnir. Per chest l Trentin, ence aldò de sia storia de Autonomia, l cogn se tor fora de anter per proèr de neves modie e ge arsegurèr servijes de calità a chi che te chest moment à più de besegn e che ge à dat l met al Trentin de esser chel che l é ades”.
La Rsa de Lisignago la tol dant 74 jent. L é stat sotrissà che la gestion de la Rsa de Lisignago l é na soluzion che garata ence de gra al zenter per l dì che tol dant vint jent de età te la strutura de la Rsa, e a la colaborazion percacenta co la Comunità de Val.
Drucan chest link se pel desćiarièr imagines e intervista
L’intervista al assessor Mario Tonina
La imagines de la scontrèdes
Traduzion di Servijes Linguistics e Culturèi del Comun general de Fascia
