Dise, khurtz khött, di prodjèkte boda soin khent ågenump zo schütza:
"Summer club 2023" a prodjèkt von Bersentolar Kulturinstitut boda hatt ’z zil zo schupfa di khindar un di djungen zo nütza da möknar zung spilante auz pa summar. A starchar punkt von prodjèkt iz dar sèll zo macha khennen di kultùr von lentar nützante di zung von lentar sèlbart;
“Nützan da möknar zung in khindargart vo Vlarotz”, gemacht von Bersentolar Kulturinstitùt vor di khindar vodar möknar kamòuschaft, boda hatt ’z zil zo macha nützan di zung vodar zungmindarhait in mearare sachandarn boda khemmen getånt ka schual. Dar prodjèkt lekk vür åzostèlla a mentsch boda iz muatarzung möknar zo schütza di maistre zoa zo macha höarn mearar di zung von lånt, daz mindarste vor viar urn aftn tage;
"’Z Bersentòl zbisnen spil un realitét” vürgelekk von schualn vo Pèrsan 1, boda bart nützan garadege stratedjìan zo lirna di zungen von zungmindarhaitn übarhaup innvångante di famildje von schüalar un di kamöüschaft. Zbisnen dise prodjèkte izta dar sèll zo lega au drai kürs zo lirna da möknar zung vor groaze;
“kürs zo lirna da ladinar zung vor groaze – djar 2023”, vürgelekk vodar Scola Ladina de Fascia. A prodjèkt vor alle di sèlln boda bölln ren, lesan un schraim da ladinar zung, haltante o kunt von prüf zo haba in patentì vodar ladinar zung;
"Gian zo khenna di zungen un di lentar boda lem di zungmindarhaitn" (schualn vo Folgrait-Lavòu-Lusérn) drinn in an gröazarn prodjèkt zo geba mearar vèrt un zo schütza da zimbar kultur un da zimbar zung, gianante vür pinn sèll boma sa macht in khindargart vo Lusèrn;
Prodjèkt “Khlummane lustege tritt”- djar 2023”, vürgelekk von Kulturinstitut Lusérn boda hatt ’z zil zo macha vorstian da zimbar zung alln in khindar boda gian in khindargart vo Lusérn. Dar prodjèkt lekk vür åzostèlla a mentsch muatarzung boda bart arbatn pittnåndar pittar maistra von khindargart un von Khlummane lustege tritt vor di khindar von drai månat sin afte sèks djar;
"Schualpuach 2023/2024" (Kulturinstitut Lusérn), a bichtegar strumént vor di famildje boda håm khindar boda gian ka schual. ’Z schualpuach iz sa auzkhentgètt åna zo mochaz zaln vorz djar 2022, un est bartz khemmen gemacht mearar raich pitt naüge argomentn un bart soin dupplzung, zimbar-taütsch, asó makma seng di zboa zungen pittnåndar.
Übarsetzt von Schaltarle vor di zung von Toalkamou vodar Zimbar Hoachebene
