En Jorzòmmtrèff hòt s drinn aa trentiner va de gamoa’schòftn van zimbern ont van bersntoler

De taitschn sprochgamoa’schòftn en Balschlònt hom se pfuntn ka Bosco Chiesanuova

[Mòcheno] Vour a por ta hòt se gahòltn ka Bosco Chiesanuova, oa’s van derver va de zimbrische gamoa’schòft van XIII Gamoa’n va Verona, der jortrèff van Komitat van taitschn historischn gamoa’schòftn en Balschlònt. Der Komitat, as ist augòngen en 2002, pintet zòmm instituzionen ont vraischòftn as kemmen van 17 taitschn sprochinseln as se vinnen en gònze balsch toal van Alpn, van Aostatol vinz en Friuli Venezia Giulia.
De gamoa’schòftn hom a toal sòchen as glaich sai’, ober de hom aa ausònderega sprochelementn as enteressiarn en de auskennlait. De sprochen as haitzegento praucht kemmen, sai’ asou bavai s hòt gahòp an austausch ont kontakt pet òndra sprochen ont lander, as sa gamòcht hom kemmen eppas oa’zeges. Va auset tsechen, toaln se se en zboa groasa familie: de poarischen as se vinnen en Friuli Venezia Giulia, en Veneto ont en Trentin ont de alemannischen as sai’ en Piemonte ont en Aostatol.
Der jortrèff ist an moment bo as men austausn ont herziachen tuat de sèlln as sai’ de problemen, as bolten vert sai’ de glaichen, ober en kontèkstn as en de unterschidlechen Regionen gònz ònderst sai’ kennen, ver gasetzn oder òndra faktorn.
Ka Bosco Chiesanuova sai’ ausgamòcht kemmen de normaletn sòchen van a vraischòft ont s sai’ vernaiert kemmen de orgln: de koordinatoren ist plim de Anna Maria Trenti Kaufman va Lusern ont sekretare der bersntoler Leo Toller.