S hòt gahòt asou vil vrong za schraim se inn as s ist kemmen sperrt de onlineinnschraib vifzen to vouraus van rifto as baret gaben as de 15 van schanmikeal. De datn lòng sechen as hòt enterèss: der projekt hòltetinn a kèr au a kèr o 30 schualn, en gònzn 47 trèffen. S doi billt song as mòchen toal 72 klassn ungefèr 1200 kinder ont studentn en doi schualjor. De naiekait bart pòcken bòlten lait, pet de schual: van earstnschualn finz en de zbaiteschualn (licei, technike ont òrbetnschualn).

De learvourtschbinn van projekt, gem a’ne kostn van u’stelltn van GECT Euregio, tuat se vourstelln vernaiert ont gip mearera interaktive tematische naikaitn. De òrbetn, as ungefer zboa-drai schualstunnen dauern, tschbinnen vour an multimedial vourstell, klòffmomentn, gruppnòrbetn ont onlinespiln ver za verstea’ biavle as men u’ganommen hòt. Pesser tsòk, de klassn kemmen en gruppn toalt ver za òrbetn no en temen abia “A roas za kennen der Euregio - bou as ber sai’, va bou as ber kemmen”, “De erkennkòrt van Euregio - ber as ber sai’”, ont verstea’ “Bos as ens u’henk ont en bos as ber ònderst sai’ - ònderst ober asou endlech!”. S kemmen vertiavert de temen abia “De zòmmòrbet aus de grenz - Bos as ber tea’ ont avai?”, paispiln va Euregio projektn, de sprochen ont de sprochminderhaitn, ont der workshop va Projekt Management Euregio.

En doi vurm, de schualer ont studentn, pfiart va auskennlait ont van aigenen learer, barn en an spilrvurm bichtega sòchen u’nemmen iber en de gschicht van drai lender ont van pau va de Europeische Gruppe  va lòntzòmmòrbet Euregio Tirol-Sudtirol-Trentin, bail en ring va zivil ont en de stòttkear lear.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol