[Ladino] A la Jebia culturèla de l'Euregio che la é stata metuda a jir aló da la Cèsa de la Peisa de Busan, l é stat rejonà de identità ladina a la prejenza de n muie de jent, che la se à passà na sera n muie ricia sot l mot “Jir, vegnir de retorn, restèr” tel segn de desvaliva formes d’èrt.
Do dai saluc istituzionèi del secretèr general de l'Euregio Christoph von Ach e l'introduzion de la dozenta universitèra Ulrike Kindl, la scontrèda la è stata reta da la moderadora Nadia Moling. Per fèr na bela atmosfera ge à pissà do ence la autores jones Lucia Piccolruaz e Silvia Baccanti da la Val Badia e l grop rap "Cooperaziun Planta": con poejies, ilustrazions e musica con chi che l è stat portà dant tematiches desche l sentiment de partegnuda e l stèr de cèsa. Très chesta desvaliva formes de esprescion artistica, te chesta sera se à volù jir a enrescir l leam fon, enceben che mèlsegur, anter la persona e so teritorie, na costion n muie emportanta per la popolazion, soraldut per i joegn che i vif te la valèdes turistiches che à abù n gran svelup e che veit ruèr sacotanta jent, co n cost de la vita n muie aut descheche l è te Gherdena e te la Val Badia.
Endèna l event i ghesć à podù viver, col president del Consei di Comuns de l’Euregio Andreas Schatzer, l diretor per l’istruzion, la formazion e la cultura ladina Andrè Comploi, la presidenta del Istitut ladin “Micurà de Rü” Lara Moroder e l diretor del Istitut de cultura “Cèsa de Jan“ Denni Dorigo, l dilema del sentiment de partegnuda, del encresciujum, del scomenz da olache se vegn e del stèr e del viver te duc si segnificac.