[Mòcheno] S sai’ garift en sunta as de 30 van agest de Euregio Days pet en To van Tirol ka Alpbach. Abia va praich, der Euregio Tirol Südtirol ont Trentin organisiart de doin ta ver za drauklòffen ont trèffen se zbischn politik, bisschòft, birtschòft kultur ont pakimmern se van nain generazionen, pet de zòmmòrbet van Europeische Forum va Alpbach (EFA). Ver en earste vòrt haier de viar to van Euregio sai’ kemmen gamòcht en vurm va zait ont ver argomentn en zentrum van Forum, as ver en prauch van umzug ont van Euregio Summit as hòt gòp abia viarn drot van trèff der spruch van Euregio Days: “Stòrcha Regionen. Stòrcha Europa. Zòmm!”.
Ver en President van Euregio ont kapitan van Tirol Anton Mattle, “a stòrcha Europa geat au nèt lai ka Bruxelles, iberhaup semm bou as de lait zòmm aa benn de bea’ne sai’ vinnen virm ver za òrbetn iber de grenzn. Der inger Euregio lòk schaung òll to abia de lokal kròft kimmp europeische kròft. Ver dòs ber miasn mear tea’ ont gem mear kròft en de Regionen”.
Der president Fugatti hòt gadenkt as der toalnimmp van an schouber jarder en To van Tirol ont en Forum va Alpbach: “S hòt òlbe eppes mear za learnen va de inger glaiche gschicht, kultur ont praich- hòt er unterstraicht - Aa benn s hait ber mòchen toal van an òndra stòtt, ber bissn abia bichte as ist hom a glaicha gschicht za denken ont nèt vergèssn. Abia as ist kemmen gadenkt hait, der Euregio vourstellt an modell ont an ideal va zòmmlem zbischn lander ont kamaròttnschòft nèt lai ver ins sèlber ober ver de gònze Europa. Ber bissn as ber miasn envire gea’ za òrbetn en num van doi ideal”.