Mercoledì, 15 Luglio 2026 - 16:36 Comunicato 2112

Marchiori: "Ber belln asou a struktural ont oa’zege omport gem en gònze Trentin"

Politik ver en haus, nea’mer de òltn kritern: hilf ver de zins en gònze Trentin

Traduzione in mòcheno

[Mòcheno] Gem omport en de neat za gem hilf ver de zins ont bècksln de sèlln ver de haiser gamòcht ver de politik ver en haus pet òndra virm as kemmen gem en gònze trentiner lònt. S ist bos as sok de ausrot vourtrong van assessor en de politik ver en haus, Simone Marchiori u’ganòmmen en vraita as de 10 van heibeger va de Provinzaljunta. De mosnemm ist noat ver za versichern de provinzalhilf ver de ausònder òrbetn ver iaz ont ver de zukunft, abia s vernaiern van haiser ver za verzinsn ont de projektn ver za gem bèrt en de derver as reskiarn za kemmen verlòk.
“Ber belln asou a struktural ont oa’zege omport gem en gònze Trentin - hòt unterstraicht der assessor Simone Marchiori - de neat ver za hom a haus en zins pet minder gèlt kearn nea’mer lai en de groasn stòttn. Ber hom aussertschauk de gònze lòntschòft ont ber tea’ schutzn s bider gea’ za lem en de derver as mear aus sai’, asou za gem de moglechkait za giltn, pet an glaichen strument, de insern sozialpolitik”.

La SP 135 all'altezza di Fierozzo San Francesco / Auserpèrg [ Fotoarchivio Istituto Mòcheno/Bersntoler Kulturinstitut ]

Finz hait, de heachestn kost van zins sai’ gaben galeikt lai ver de 12 greasestn gamoa’n (Ala, Arco, Burg, Cles, Lavis, Leive, Mezzolombardo, Mori, Persn, Riva del Garda, Rovereto ont Trea’t). Pet en doi akt, ver za gem omport en de noatekait za meing hom hilf ver de zinsn en òndra lander aa, kemmen gem de glaichen bèrtn ver òlla de Gamoa’n va de provinz, ont derzua bou as noat ist kemmen galeikt ausòndra bècksln ver de derver as aus van zentrum sai’.

De zboate bichte naiekait ist as en prauchen va de kommercial plòtt (as derzua hòltet de mauern, de metre dernem ont de ausbendegen plòtzn) abia nai’ kritern ver za zeiln de metre en plòtz va vourher. Ver za gem de meareste sicherkait, de nain heachestn zinsn, ver de ziviln haiser as nai oder guat gahòltn sai’, sai’ kemmen ganòmmen no en de datn van Drauschauer van Haiser (OMI), van Staieromt, va drucker as gilte sai’ ont van oa’nekaitn as sai’ van lònt, kemmen gamòcht turch an bisschòftn metode u’ganòmmen dirèckt van ISPAT (Istitut ver de Statistik va de Provinz va Trea’t). Ver de doi naiòrbet praucht men nèt gèlt vort leing asn provinzalbilanz. Va de doi mosnemm ist kemmen earst vourklòfft en CAL, ont asou ist kemmen u’ganommen de oa’nekait van pirgermoastern ver de òrbet ont ver de virm as praucht kemmen sai’.

Pilder ont vrong notschauk van druckomt

Vrong en assessor Simone Marchiori