Men tschbinnt en drai’ kategori, ver de doin trittn:

• Tritt 1: earste schual (Südtirol, Trentin), Volksschule (Tirol);
• Tritt 2: zbaite schual va earste grat (Sudtirol, Trentin), zbaite va 1° grat (Tirol – Mittelschule ont zbboa jor unter van AHS);
• Tritt 3: zbaite schual va zbaite grat, earste zboa jor (Sudtirol, Trentin), earstn zboa klassn va de sbaite schual va 2° grat (Tirol).

Men kònnt vinnen zeichen learviarung as temen abia de gschicht , sprochen, mobilitet ont identitet. No sèll as de hom galeart, de gruppn va klasse trong envire oa’s oder mear temen noch en tritt va schual. De greas van òrbetn van jungen toalnemmer as ausser kemmen sai’ òlbe mear schbar: van poster finz en de nain media, finz en de dinger gamòcht pet de hent oder gamòcht pet de sechenart ont performance art, va de musik ont va de letteratur. En òlla vrok men bolten kreativitet.

De klassn meing toalnemmen benn de melln se u’  as de onlineplòttform scuola.euregio.info , bou za leing drau de òrbetn gamòcht. S bart kemmen tschèrllt de peiste klasse ver an iata kategori ont ver ourt. En de earst ont zbaite kategori, de doin klassn barn sai’ inngallont en an riftrèff òlla zòmm. En de dritte kategori, enveze, de klassn as kemmen tschèrllt barn toalnemmen en an trèff va zboa ta en oa’n van drai’ eirter van Euregio. Òlla de schual as barn toalnemmen barn meing kriang der titl va “Schual Euregio”.

Mear envire de onlineplòttform bart nou kemmen verpessert. Drinn bart men vinnen sèll as ist auser kemmen van projekt “Euregio goes school”: en de leistn va moi bart embiarn der projekt zòmmzuazolt va de Europeische Union en programm Interre Balschlònt-Osteraich, as leik zòmm òlls sèll as men kònnt gem en de schualn van Euregio-Tirol-Sudtirol-Trentin, asou as de schualn meing sa prauchen zòmm.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol