Focus as de u’lear ont as de nain digitalmittln. Marchiori: “Aupaun de zukunt pet de jungen”. Gerosa: “De zòmmòrbet zbischn de lander ist an gilt ver de u’learbòcks van studentn”
“Der Euregio en de schualn” der earste eirta van Euregio 2026
Traduzione in mòcheno
[Mòcheno] S ist u’pfònk en Haus Moggioli, der sitz van omt nochricht ont regiar van Euregio Tirol-Südtirol-Trentin, de viarte edizion van “Eirtecher van Euregio”. Der earste trèff van 2026 keart en de òrbetn va de schual, pet en zil za stelln vour naia u’lear strategi ver za mòchen kennen de learòrbetben, s learnen de taitsch sproch ont de zòmmòrbet aus de grenzn. Der trèff, augòngen va de sinergi zbischn der Euregio, der Learinnricht va de Autonome Provinz va Trea’t ont IPRASE, hòt zòmmtroffen gamòcht learer va de earste schual ont va de zboateschual va earste tritt. En trèff hòt toalganommen der provinzalasesor pet en ibergem en unterstitz van kennen de Autonomi, Simone Marchiori, as de grias va de asesora en learnen Francesca Gerosa trong hòt. “Trong der Euregio en de schualn ist bichte: s billt song learnen en de nain generazionen de bèrtn van zòmmlem, va de zòmmòrbet ont van klòffen se zbischn de eirter. Men paut de zukunft va do, pet en u’vòngen van jungen ont van kennen zòmmbòcksn, ont nèt ausenònder, van insern lender”hòt unterstrichen der Marchiori. S ist gaben der Schualvourstea’ner ver de Autonome Provinz va Trea’t, Giuseppe Rizza, aa, as tsòk hòt: “ De projektn van Euregio gem bèrt en learnen van trentiner schualn ont versterchern s europeische hearn. Der verglaich zbischn schualvirm, de òrbet van learer, de òcht en de mearersprochekait ont s prauchen naia plinder za learnen hèlven za paun ziglnring mear klor, offet ont strukturiart”. Rizza hòt ibertrong ont unterstitzt de beirter va de assessor Gerosa, ont unterstraicht de rèchtn ziln va de doi naiòrbet. Bail en trèff, de Gerosa hòt tsòk as e vroa ist va de doi naiòrbet ont hòt unterstraicht s gilt va de doi zòmmòrbet: “Der Euregio derstellt ver de insern schualn a konkret moglechkait, as versterchert de sprochbissn, de learòrbetben ont s kennen se zbischn de drai lender. De u’learbissn aus de grenzn sai’ an gilt va mear ver de u’learbòcks van studentn, ont versterchern s kennen de euroregional greas ont der internazionalrom”.
Bail en trèff sai’ vourtstellt kemmen de bolten verpessern van learring Euregio ver en jor as kimmp. Iber en de bichtekait van doin plinder hòt klòfft Elisa Bertò, vourstea’neren van Trentin en Iberòllsakretariat van Euregio: “De vourtschbinnen ver en schualjor as kimmp sai’ raich va naikaitn, za vongen u’ van restyling va “Euregio mòcht schual”, as kimmp bider pet an online portal as mer laichter versteat ont der u’vong va “Euregio goes school”, der nai projekt Interreg Balschlònt- Osterraich. De didaktik ist derzua òlbe mear dinamisch: der format “Der Euregio trèfft de schualn” mòcht se nai pet bèrkstòttn va project managment ont òrbetn va leargaming. S plaip der focus iber en de schaulpartnertrèffen, as sai’ òlbe an stitz ver en zòmmklòffen van studentn.
Der zboate stuck van trèff hòt gem de stimm en de learer: durch en kontarn van echtegen lemring, mearer learer va mearer schaulinstitutn hom kontart va gschichtn va partnertrèffen, projektn ont learstrategian va de taitsch sproch as guat gòngen sai’, ont va zòmmòrbetn pet de lokalinnrichtn aa ont en prauch van Zboasprochege Oa’negea’. De naiekait ist garift pet an operatif workshop ver za meing hom an feedback as de nainòrbetn as schoa’ hòt ont asou meing zòmm-projektn mòchen as de nain u’learmittln as barn kemmen derzua galeick en leistagest van doi jor.
Letratn notschauck van Euregio
Nimm oar der service video > https://drive.google.com/drive/folders/13u1QSSPu0R_qmZ7_z7gRUwZ_WAkHjrTH?usp=share_link
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
