La desposizion la vegn perveduda aldò de la deliberazion n. 970 dai 4.07.2025, che à pervedù e metù ite, anter i requisic de azes a la profescion de operador te la coa per i fantolins-Tagesmutter tel Trentin, ence la zertificazion de la competenzes, aldò de la Lege provinzièla dal 1m de messèl del 2013 n. 10 dintornvia l aprendiment permanent. 
Chesta modalità la se jonta apede al classich percors formatif per arjonjer competenzes da 500 ores, col sporjer n sistem alternatif per arjonjer la califica.

L perfil profescionèl l é stat definì dal Servije ativitèdes educatives per i fantolins, do da n aprofondiment out a troèr fora azions sostegniboles per sostegnir la politiches per l nasciment, l suport a la families e l smaorament di servijes educatives per i fantoilins dai 0 ai 3 egn. La istrutoria tecnica la é stata gestida dal Ofize per la politiches de inclujion e zitadinanza del Servije istruzion, col meter vèrda a ge jir do al Repertorie nazionèl e al Chèder nazionèl de la calificazions (CNC). 

Meter ite chest nef perfil tel Repertorie provinzièl l é n strument zis emportant per valorisèr la competenzes che à jà chi che vel lurèr tel ciamp di servijes per i fantolins-Tagesmutter. Tel medemo temp, l contribuesc a arsegurèr standard calitatives e profescionèi auc tel ambit di servijes sozio-educatives per i picioi, desche pervedù da la normativa provinzièla en doura. 

L provediment se met dant più che un obietif: da na man smaorèr la perferida di servijes per i fantolins per ge responer miec ai besegnes de la families, tras n sistem integrà de servijes, e da l’autra sostegnir la politiches de calificazion e recalificazion profescionèla, renforzan l sistem provinzièl de zertificazion de la competenzes. 

Traduzion di Servijes Linguistics e Culturèi del Comun general de Fascia