De programm va ORF gea’ za baitern de nochrichtdinstn as schoa’ sai’, asou za verraichern sa ont vermearern sa. S ist an vourtschbinn as derzua en de innhòltn van lokaln telebisionnetzn gea’, as iber en temen as guat prauchen kemmen ver en Trentin klòffen, ont as unterstitzt kemmen van Dinst ver de Sprochminderhaitn ont ausbendegen netzn, avai s ist an dinst va òllgamoa’ birtschòftlege enteress. De naikait gip an paitrog ver za kennen de taitsch sproch, de osterraiche gamoa’schòft ont sai’na besonderhaitn.
En moment giltet a konvenzion zbischn Region, GECT ont ORF ver za gem aus avn regionallònt, turch en Ras (Radiotelevisione Azienda Speciale) as hòt za tea’ pet en ausgem en gònze Euregio nochrichtn ont telebisiondokumentarn gamòcht va ORF (Osterraiches radiotelebision Innricht) as hom za tea’ pet en Trentin. Zbischn de riven van GECT men unterstraicht de nochricht ont s baitern de eirter bou as men sicht, s pesser sechen ont mear nochrichtn ont televisionprogramm as men mu’ pet de media - iberhaup pet emitettn va ourt as òrbetn en de eirter ont emittetn va òllgamoa’rècht - ver za lòng mear kennen de sprochen, de kulturn ont de ausònderkaitn s verpuntn va de birtschòft ont va de gamoa’schòft en gònz lònt van Euregio.
Finz iaz de konvenzion hòt nounèt gamu’ enviregea’ ont de programm hom gamecht sai’ tsechen lai en a stuck van provinzal lònt.
Gèltsgott en de mittòrbet pet Trentino Digitale, de provinzalamministrazion hòt se oa’ne galeik ver za lòng mear sechen (5 Mbit/s en gònzn) ver za versichern s pesser ont schea’ner sechen ont lòng sechen en gònz provinzallònt der dinst, s ist drinn gor Palai en Bersntol (kan Lenzn), as vouraus hòt nèt tsechen.
De vourtschbinn ist kemmen unterstitzt van òlla en de Konferenz van minderhaitn avai ver òlla ist se bichte. Der dinst ist kemmen gem en de bèrk El Towers, der oa’zege as ist ver en Trentin.
Der numer van kanai - 75 ver ORF 1 ont 76 ver ORF Sport - ist kemmen gem van Minister van bèrkn ont van Made in Italy petn dekret van 9 van prochet.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
