[Ladino] Prejentazions interatives, debatic, conscidrazions e jeghes didatics che revèrda la cooperazion sorafora la seides, la storia, la varietà linguistica e etres argomenc che entereassa da vejin la realtà de la istituzion e del teritorie: l projet “Euregio incontra la scuola” metù a jir del 2024-2025 à abù n bon ejit, con 27 istituc scolastics trentins che à tout pèrt e presciapech 1.200 partezipanc en dut.
L’ativitèdes – metudes a jir per la maor pèrt te doi lengac – che tol ca tel particolèr la storia di teritories e la carateristiches de la Istituzion Euregio Tirol – Sudtirol – Trentin les é states metudes a jir te desvaliva tipologies de scoles, per duc i livie de istruzion, da la populèra a la scola auta, dai tecnics ai licees e a la scoles profescionèles, da la scola ladina a chela Montessori, loghèdes fora per la valèdes de noscia Provinzia e a Trent. N muie de scontrèdes les é states fates a “Casa Moggioli”, senta trentina del Grop european de cooperazion teritorièla (Gect) Euregio e dotrei intervenc i é stac domané ence da de etres enc, desche l’Università de la terza età e en colaboraziom con desvaliva istituzions, desche la Fondazione Museo Storico del Trentino.
Anter i argomenc descorec fora: geografia, storia, Autonomia, lengac, funziament e endrez de Euregio, projec dediché ai joegn, a la scola, e de enteres per i sentadins.
Te chisc egn, la materia “Euregio”, per sacotenc istituc, la é doventèda na atività didatica “standard” tel ambit de la educazion zivica e a la sentadinanza. Belimpont n miue de scoles à confermà endò la domana de poder meter a jir l projet e 12 scoles neves se à jontà ite chest an.