Traduzione in cimbro
EuregioSummerCamp 2023, ma makse innschraim åhevante von 15 von hornung
Dar camp bartze haltn von 20 atz 27 von snitt atz San Valentìn vo Brentonico. Dar camp bart khemmen vürgelekk an erta boda khint in Casa Moggioli
Ma bart mangse innschraim åhevante von 15 von hornung aftn EuregioSummerCamp 2023 bodase bart haltn von 20 sin atz 27 snitt un azpez iz traditziong bartar soin gepuntet dar natùr. Geherbeget in an hotèl atz San Valentìn vo Brentonico, in Trentino, schiar 60 djunge bartn mang auzmachan a schümmana boch khennante naüge tschelln stianante alle pittnåndar tortemìtt bisan un beldar. Di mearare zungen boda bartn khemmen geredet bartn niamat auhaltn ombrómm, arbatante un spilante pittnåndar, någeholft vo laüt mutarzung, saiz belesch, saiz taütsch, ditza bart nèt soin an sprentz. Dar progråmm, defatte, lekk vür khurtze kürs zo lirna di zungen, darzuar åndre sachandarn zo macha in di fraizait azpe sbimmen odar spiln pinn palù.
Disa vürlegom bart khemmen gezoaget an erta boda khint, atz 14 von hornung, in Casa Moggioli, setz von Euregio ka Tria, in zboate trèff vo disarn stadjong von Erta von Euregio. Dar trèff bart soin offe vor alle di sèlln bosen interesàrt, un bart soin di sèkse abas in Via Grazioli,25.
Dar EuregioSummerCamp iz vor alle di puam un diarnen von Trentino, Südtiról un Tiról gebortet in di djar 2009, 2010 un 2011, boda khånen a pizzle soi zboate zung (taütsch odar belesch); di boch defatte bart soin gåntz in zboa zungen. Allz bart khemmen durchgevüart vo laüt muatarzung un von sèlln boda bartn vüarn di djungen. Zo nemma toal bartma mochan zaln 150 euro vor allz, èzzan un slavan o, odar 180 euro pinn viazo zo khemma un zo kheara bidrùmm gevüart.
Dar EuregioSummerCamp 2023, augelekk von toal Åmt von Euregio Tiról-Südtiról-Trentino pittnåndar pitt Equipe Natura, bart haltn kunt von protokòll Covid-19 un azta iz mångl lazzan azta khemmen gemacht test Covid odar zoang in Green Pass. Azta dar EuregioSummerCamp 2023 hettat nèt zo khemma gemacht peng dar sanitér emerdjéntz barta khemmen gètt bidrùmm ’z gèlt gezalt.
Zo bizzasan mearar: https://www.europaregion.info/it/summercamp/
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
