Ibearearstn de iberòll sakretare van Euregio Marilena Defrancesco hòt tsòk abia bichte as sai’ de zòmmriaf ver de lait as regiarn de zait va bècksl van jungen, ont hòt unterstitzt as der Euregio Tirolo-Südtirol Trentin, finz va benn as der ist augòngen en 2011, hòt galeik de jungen en de mitt van sai’na projektn ont bail de Trentinisce presidenz 2021-2023, as schraip “Der Euregio ist jung”.
Sbaredella ont Ceccato hom klòfft iberhaup van prozess ver za tschèrln va benn as men ist kloa’ finz as men bòckst, as ist ònderst en an iata èltekait ont en de bècksl as kimmp tsechen: bail de zait as men nou kinn ist ont vour de zait as men jung ist tuat men òcht gem en de aigene bòckzait ont en de identitet van kinn-student. Derno va de jung zait, derno as men hòt tschèrlt de schual no de zboate schual va earste grad, tuat men schaung gor bos as men ist brafer za learnen, gor unterstitzt va de schual ont van òlla de lait as mòchen toal van doi prozess. Der Trentin trok envire vil naiekaitn ont naia òrbetn ver za kennen tschèrln: zan paispil s hòt Trentino Orienta ont der portal Vivoscuola, ont nou der portfolio as gip a hilf en sèll as men tea’ bill en lem. Nèt minder bichte ist nou sèll as tuat de IPRASE ver za paroatn de learer ont ver za gem en a hònt asou as de meing pesser verstea’ sèll as de jungen kennen pesser tea’.
Bail de earste toal van trèff de Raffaella Di Iorio van Euregio hòt a zòmmsetz gamòcht va abia as augòngen ist der projekt ont gadenkt van an òrbet stitzt van Euregio, bail de tiroler regiar, asn vurm as de jungen lem. Derno de Stefania Terlizzi va de òrbetagenzi hòt derklort òlls sèll as men hòt gatu’ ver za mòchen de vourtschbinn. “De noat as mear gaheart hòt ist de sèll as de bèlt va de schual ont de bèlt ver za learnen an òrbet miasn mear glaim sai’, durch naiekaitn ont hilfdinstn. Ver dòs hòt men tschbunnen en an u’lear mear “modern” van u’learer as hèlven za tschèrln, as mear òcht gip en de psico-sozial mittln van lait ont as glaimer ist en de neat va haitzegento, abia prauchen de nain technologi ont kennen lòng de virm za kennen se ver za meing pesser tschèrln”, hòt se derklort.
Zbischn de techniker as hom klòfft, ist gaben der Franco Fraccaroli, learer va de Universitet va Trea’t, as hòt patschrim de bichtestn psico-social mittln as kemmen drinnganommen bail de zait as men groas kimmp. Voursicht ont offetkait sai’ runt bichte, ober de stòrchekait ont kennen verstea’ de aigene grenzn mòchen pahenner verstea’ abia za nemmen vour de sòchen. A guata vourstell va selber ont bissn bos men guat ist za tea’ ist runt bichte ver za hom glick en lem, ver de schual ont ver de òrbet derno aa. De virm za learnen de sòchen ont de nètzn zbischn de lait sai’ bichte ont gem de moglechkait za iberlem pesser s envire gea’ va de zait.
Der Francesco Pisanu, van Omt ver za schatzn de politik va de schual van U’leardinst va de PAT, hòt vourstellt de bichtestn òrbetn van projekt en de drai lander. De earste toal va de suach hòltet drinn de dokumentn va de untersuach ont van vrong. Asou barn kemmen gamòcht de u’learòrbetn ont derno tschbunnen de beil politik za trong envire. S barn kemmen ganommen abia paispiln a por òrbetn ont biografi ver za learnen u’ de lait, derbail de virm ver za kennen se pesser schatzn barn drinngahòltn sai’ en an ausònder digitalplòtz, bou as de studentn va de zboate schual va earste grad barn meing drinn gea’. Der projekt bart riven pet an test as bart schatzn benns der hòt gaholven.
Bail de vria òndra zboa vourstelln va auskenneta lait as hom klòfft va tschèrln ont mentschraich. Damiano Previtali, president van Schatz Provinzal Komitat van Trentiner schualsistem ont techniker viarer kan Minister ver de u’lear ont verdea’, hòt derklort de zòmmpint zbischn de nain ministerialn rotn as de tschèrln ont der projekt “Transizioni” as men barn meing nemmen abia moglechkait durch de zuazoln van PNRR semm galeik ver de doin òrbetn. S hòt nou klòfft en videokonferenz der Giorgio Vittadini, va de Universitet Milano Bicocca, as hòt derklort de “kompetenzn nèt kognitiv”. Sèll as kimmp tsòk asn doi ist as en vil sòchen van lem van jungen kònnt men sa vinnen: as de qualitet va de u’lear, asn guat envire gea’ pet de òrbet, asn lem, as de tsunthait ont asn guat stea’ en de gamoa’schòft. S ist runt bichte, ver de schual ont ver de u’lear schatzn de doin sòchen abia zil ver de u’lear durch òrbetn as learnen ont groas mòchen kemmen, abia as s ist kemmen schoa’ gatu’ en trentin en de doin leistn jarder.
Derzua: de slide va de òrbetagenzi
Letratn ont film notschauk van Druckomt
Download ont pilder ont vrong do https://bit.ly/40kjLph
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
