[Mòcheno] Durch an kritischn plick as en lem van a vòrt, de ausstell en Volkskunstmuseum va Innsbruck “unRècht! Gschicht va sozialeta unrèchtigkaitn” as ist toal van Museumjor 2025 va de Euregio, lont inn de lait za tschbinnen drau as an ettlena bitchtega ont prenneta questionen va haitzegento.
As en tema van sprochminderhaitn ont mear as ònderst as de sprochen as praucht kemmen en de schualn, der paispil as vour steat ist der sèll van bersntolerisch. Lai sait gònz kurza zait ist s inntretn en de schualbèlt, ober en de gschicht de sproch as dominiart hòt ist nèt òlbe gaben de balsch. Bavai, en de zait zbischn de ’60er jor van XIX jorhundert vinz en Earste Bèltkriag ist innpfiart kemmen – benns aa nèt òlbe gònz guat gòngen ist – de taitsch schual. S toal va de ausstell as en doi tema lòkt schaung drai òrbetn gamòcht va kinder va de schual en Bersntol as kemmen van Archiv van Bersntoler Kulturinstitut va Palai en Bersntol: a heft as taitsch van jarder 1910-11, an ettlena kurza gschichtn pet zoachn as balsch van ’70er jor van vourder jorhundert ont an òrbet as bersntolerisch gamòcht en 2023. Zòmm pet de drai òrbetn hòts an tèkst as paschraip de gamoa’schòft ont de intiziativn as envirtrong kemmen ver za unterstitzn s bersntolerisch ont an kurzn audio as bersntolerisch as paschraip de gamoa’schòft.