Alberta Rossi, responsabola de la Biblioteca spezialistica del Istitut e del projet, la spiega percheche l é stat cernù chesta doi persones: "Chest an aon zelebrà l diejem cedean de la mostra “La Gran Vera-La Grande Guerra: Galizia, Dolomites” che la é ja Moena e dachelanvia l Museo Ladin l à metù a jir na lingia de scomenzadives tematiches. Aon dezidù donca de ge dedichèr a chest argoment ence la ativitèdes sul teritorie de la biblioteca e per chest event aon chierì fora Catina Pezzé Batesta e Bepi Felicetti Zompin, duc doi joenec che stajea a Moena e a Someda ti egn de la Gran Vera. La stories che contaron e che portaron dant te chesta ocajion les merita delicateza e sensiboltà, tant percheche contaron la vita de doi joegn tel contest de la Pruma Vera Mondièla ― n event che à straout e mudà la vita de l'Umanità ― tant percheche, do passa cent egn, aon amò vere sun usc de cèsa".
Autora e regista del test l é Ilaria Chiocchetti da Moena: "La raprejentazion la vegnarà spilenèda dedant la cèsa de naa de Catina, olache n’outa l era la pecaria de familia. Aló la vita de Catina, de Bepi e de sia families les se scontrarà e les se enterzarà co la realtà de la Gran Vera te Fascia. Per scriver l test é durà ence la intervista video a Bepi Zompin che l é te Archivie de la biblioteca del Istitut Cultural Ladin e l liber “Piccolo diario di Caterina. 1912-1918: dalla pace alla grande guerra”, diarie scrit da ela enstessa endèna la vera e publicà del 1995 dal Grop Ladin da Moena. Sessaben, desche per i etres projec, é tout pèrt dessema al personèl del Istitut a la intervistes fates ai parents e ence da chestes é podù tor fora materièl prezious".
"Aon chierì fora la data dai 3 de november" ― disc amò Alberta Rossi ― ajache ai 3 de november del 1918, apontin acà centesie egn, l é stat sotscrit l armistizie che à metù fin a la Gran Vera. Con chesta raprejentazion volon dèr ence nos n messaje atuèl e fon sul valor de la vita e de la pèsc e su la emportanza de la colaborazion. L é con chest spirit che ge aon lurà do al projet e speron de esser bogn de ge passèr chest message al publich. Ve speton te la “Cort del Batesta” (dedò Piaz de Ramon) a Moena".
No vegn domanà la prenotazion.
