L argoment anunzià dal endrez de Archivissima (net nazionèla di archivies) per l 2024 l é chel de la pascions “fones, caleidoscopiches [...] e per secoi n leam fort anter la jent [...], motor de enrescida per la trasformazion de la sozietà”. descheche disc l envit a tor pèrt. Vegn uzà fora la emportanza di archivies per  enrescir, entener e esplorèr la pascions, per ge dèr lèrga a la idees, a la libertà di pensieres e a l’èrt de la marevea. Segur duta chesta gaissa e chesta pascion de descorir, moscèr, entener la marevea de la Dolomites - e anter chestes de sie jent, de sie valores e de sia sozietà - les se palesa tel archivie fotografich de Franz Dantone Pascalin, om ecletich, curious, inteligent e co na ment zevila.

L event l é spartì te trei moments. Da les 4 domarena, te sala grana de Istitut, na meisa torona te chela che vegnarà portà dant la storia del fon fotografich, i lurieres stac per l recuperament e l restaure de lastres e foti, l valor storich e identitèr del artist e l recort del paron del fon, Franco Dezulian, che l ge à lascià a sia familia l gran melaur culturèl e artistich e al joen nez che l à rità la pascion per la fotografia. Se serarà su la pruma pèrt con n moment de debatit sun coche l fon podarà esser valorisà e fat cognoscer tel davegnir. 

“Te chest viac de cognoscenza del archivie Pascalin - sotrissea la Diretora de la Majon di Fascegn Sabrina Rasom - saron compagné da la esperta che se à cruzià del restaure Elvira Tonelli e dal archivist Luciano Defrancesco; dal curator de la mostra Davide Baldrati dessema col paron del fondo Lorenzo Dezulian;da Katia Malatesta del Archivie fotografich storich provinzièl de Trent; dal artist fascian Claus Soraperra de la Zoch e dal storich fascian Alessandro Margoni, gregn cognoscidores del fotograf; e da Alberto Chiocchetti, amich de Franco Dezulian che à spartì con el  la la gaissa per la fotografia e la conservazion storica. Sion stolc de poder condivider col teritorie n moment de aprofondiment e riflescion sui desvlives ciampes de enrescida che roda dintorn l fondo Pascalin, te chel che la jent de Fascia pel cognoscer la storia del teritorie, de la sozietà e del svilup identitèr ladin”. La meisa torona sarà coordenèda da la responsabola de la biblioteca spezialistica de la Majon di Fascegn Alberta Rossi.

Te la seconda pèrt del domarena vegnarà enaudà la mostra, voluda e pissèda dessema co la Fondazion dolomites Unesco, giusta serèda a Palaz Trentini a Trent e portèda te Museo Ladin, che la restarà averta dut istà.

L event se serarà su co la net ti archivies de la Majon di Fascegn dedichèda ai joegn de Fascia, che i tolarà pèrt a jeghes a tem leé al personaje Dantone e a sia fotografia e che i podarà stèr soranet te Istitut. “Ence chest an se à pissà de ge lascèr lèrga a n moment dedicà a la neva generazions per ge fèr entener tras jeghes didatics l valor de la arpejon archivistica conservèda da la Majon di Fascegn, da cognoscer e poder aprijièr desche strument dinamich e modern”, sera su la diretora Rasom.

Archivissima la é nasciuda a Torin  del 2018 da n prum format “Net di Archivises” pissà del 2016 da Promemoria Group. L Festival l rua del 2024 a la nona edizion de la Net, che la sarà apontin ai 7 de jugn, e l se serarà su ai 9 col Dì Internazionèl di Archivies.

Video evento

https://youtube.com/shorts/NLMlDmN_o8I?feature=share

(sa.ras)